ئێران ئاگاداری ئۆپەراسیۆنەكەی (7ـی ئۆكتۆبەری 2023)ـی بزوتنەوەی حەماس نەبوە بۆ سەر ئیسرائیل، بۆیە توشی سەرسوڕمان و شۆك بون.

هەواڵ: (KNNC)

محەمەد جەواد زەریفی، جێگری سەرۆک کۆماری ئێران بۆ کاروباری ستراتیژی ئاشكرایكرد، وڵاتەکەی ئاگاداری ئۆپەراسیۆنەكەی بزوتنەوەی حەماس نەبوە بۆ سەر ئیسرائیل بۆیە لەو كاتەدا توشی سەرسوڕمان و شۆک بون.

لە وتارەكەیدا كەلە کۆڕبەندی ئابوری جیهانی لە داڤۆسی پایتەختی سویسرا پێشكەشی كردوە وتوشیەتی: تا ئەو كاتەی داگیركاری بەردەوام بێت، بەدڵنیاییەوە خەباتكردن بۆ روبەڕو بونەوەی داگیركەران بەردەوام دەبێت، هەروەك جەختی كردەوە كە بزوتنەوەی حەماس و بەرگریكاران لە فەلەستین، فەرمان لە تاران وەرناگرن.

لەسەر هێرشكردنە سەر ئێران لەلایەن سوپای ئیسرائیلەوە، راشیگەیاند: ئەو چیرۆكەی باسی لەناوبردنی بەرگری ئاسمانی كۆماری ئیسلامی ئێران دەكات، هەڵبەستراوە، رەنگە لەرابردو ئامانجێكی ئاسان بوبن، بەڵام ئێستا تاران و سوپاكەی لاواز نییە.

جێگری سەرۆكی ئێران هیوای خواست كە دۆناڵد ترەمپ، سەرۆكی ئەمەریكا، لە مامەڵەكردنی لەگەڵ كۆماری ئیسلامی ئێران، عەقڵانیەت هەڵبژێریت و بەشێوەیەكی جددی ویستی هەبێت بۆ چارەسەركردنی كێشەكان، چونكە وڵاتەكەی هەوڵی بەدەستهێنانی چەكی ئەتۆمی نەداوە و ناشبێت بە مەترسی بۆسەر جیهان.

هەفتەی پێشو، عەباس عراقچی، وەزیری دەرەوەی ئێران رایگەیاندبو: بۆ دەستپێكردنەوەی دانوستانەكانی بەرنامە ئەتۆمییەكەی ئێران ئەڵمانیا، فەرەنسا و بەریتانیا لە هەوڵەکانیان (جددی)ـن.

لەخولی پێشوی سەرۆكایەتی دۆناڵد ترەمپ، سەرۆكی ئەمەریكا، گرژییەکان لەسەر بەرنامەی ئەتۆمی ئێران زیاتربون بەشێوەیەك كە ئەمەریكا لە ساڵی (2018)ـدا تاکلایەنە لە رێککەوتنەکە کشایەوە و سزاكانی بەسەر ئێراندا توندتر كردەوە، ئەوەش زیانی گەورەی بەئابوری ئەو ولاتە گەیاند.