79 ساڵ بەر لە ئێستا یەکەم کۆماری کوردی لە ڕۆژهەڵاتی کوردستان بە ڕێبەرایەتی قازی محەمەد دامەزرا و شاری مەهاباد وەک پایتەختی کۆمارەکە دیاری کرا، سەرەڕای کەمی تەمەنی بەڵام وەک یەکەم دەسەڵاتی کوردی دیموکراتیک چاوی لێدەکرێت.

هەواڵ:KNNC

79 سال لەمەوبەر و لە ڕۆژی 22ـی کانونی دوەمی 1946 بە ڕێبەرایەتی قازی محەمەد، یەکەم کۆماری کوردی لە شاری مەهابادی ڕۆژهەڵاتی کورستان دامەزارا و کابینەی کۆماریش بە سەرۆکایەتی بابە شێخ لە 12 وەزیر پێکهات. 

ھەڵكردنی ئاڵای كوردستان لە سەردەمی كۆماری كوردستاندا، پێكھێنانی سوپای نیشتمانی ‌و ناوی پێشمەرگە بۆ یەكەم جار لە مێژووی كوردستاندا لەوێ تۆمار کرا، هەروەها چاپخانە و دامەزراندنى ڕادیۆ و خوێندن و نووسین بە زمانى کوردیى، لەو کارانەبون لە کۆمارى کوردستان لەو ماوە کەمەى تەمەنیدا ئەنجامیدا.

دواى کشانەوەى هێزەکانی یەکێتیی سۆڤییەت لە ئیران و پشتکردنی لە کۆماری کوردستان و کۆماری ئازەربایجان، حکومەتی پاشایەتی ئێران لە کانوونى یەکەمى ساڵى 1946 هێرشی بۆ کۆمارى مەهاباد برد و بەوەش کۆمارى کوردستان دوای 11 مانگ ڕوخا و قازی محەممەد، سەدر قازی، سەیف قازی، دەستگیر کران و دواتر لە 31ـی ئازار 1947 لە چوارچرای مهاباد لە سێدارە دران.