رێكخەری گشتی بزوتنەوەی گۆڕان رایدەگەیەنێت؛ هەر گۆڕانكارییەك لە رۆژئاوای كوردستان كاریگەری لەسەر هەرێمی كوردستان دەبێت و بەپێچەوانەشەوە راستە، بۆیە دەبێت پێكەوە و بە وریاییەوە مامەڵە بكەین بۆئەوەی میللەتەكەمان زەرەرمەند نەبێت، دەشڵێت: گۆڕان دەتوانێت لەم گۆڕانكاریانەی دەگوزەرێت رۆڵ و كاریگەری هەبێت، ئەوەندەمان هێز و سەرچاوەی مرۆیی هەیە كە ئاڕاستەی چارەسەكان بگۆڕین.

هەواڵ: (KNNC)

دانا ئەحمەد مەجید، رێكخەری گشتی بزوتنەوەی گۆڕان لە كۆبونەوەی لەگەڵ ژمارەیەك لە هەڵسوڕاوانی بزوتنەوەكە لە هەولێر ئاماژەی بە دۆخی سیاسی و پێشهاتەكان كرد و وتی: گۆڕانكارییەكانی ناوچەكە بەشێوەیەك خێرایە، ئەگەر هێز و لایەنە سیاسییەكان لە هەرێمی كوردستان لە رۆژئاوای كوردستان بە وریاییەوە مامەڵە نەكەین و ئامادەباش نەبین بۆ روداو و ئاڵنگارییەكان رەنگە میللەتەكەمان زیانی گەورە بكات.


بە بایەخەوە ئاماژەی بەوەشكرد؛ هەر گۆڕانكارییەك لە رۆژئاوای كوردستان كاریگەری لەسەر هەرێمی كوردستان دەبێت و هەر گۆڕانكارییەكیش لە هەرێمی كوردستان كاریگەری گەورەی لەسەر رۆژئاوای كوردستان و ئایندەی دەبێت، "بۆیە هەنگاوەكان بەو ئاڕاستەیەیە هەردولامان یەك هەنگاو و یەك روانین و یەك بۆچونمان هەبێت بۆ مامەڵەكردن لەگەڵ دۆخەكە و گۆڕانكاری و پێشهاتە نوێیەكان و چارەسەری قەیرانەكان، ئەگەر بەشێوەیەكی كاتیش بێت پێویستە هاوتەریب پێكەوە هەنگاو بنێین".


هەروەك رێكخەری گشتی رووی لە هەڵسوڕاوان كرد و وتی: گۆڕان دەتوانێت لەم گۆڕانكاریانەی دەگوزرێت رۆڵ و كاریگەری خۆی ببینێت، چونكە گۆڕان هێزێكە هەڵگری بیری نیشتمانی و نەتەوەییە و ئەوەندەش كادر و هێز و توانا و سەرچاوەی مرۆیی و كەسی لێهاتوو لە بوارە جیاوازەكان هەیە كە ئاڕاستەی چارەسەرەكان بگۆڕێت چ بۆ دۆخی ناوخۆیی و باشكردنی ژیان و گوزەرانی خەڵك چ لە روی هەڵوێستمان بۆ رۆژئاوای كوردستان،  دەتوانین بڵیین بەرنامە و راگەیەندراو و پێشنیازەكانی بزوتنەوەی گۆڕان بونە هەوێنی ئەو پەیوەندییەی ئێستای هەرێمی كوردستان و رۆژئاوای كوردستان كە ئێستا هەموان دەیبینن و پێی دڵخۆشن.


پەیوەست بە دۆخی ناوخۆیی بزوتنەوەی گۆڕان و بەستنی كۆنفرانسی نیشتمانی، دانا ئەحمەد مەجید رایگەیاند: سەرقاڵی ئامادەكارین بۆ قۆناغی نوێ و هەستانەوە، یەكەم هەنگاو بەستنی كۆنفرانسی نیشتمانییە كە یەكێكە لە داواكارییە بنەڕەتیەكانی كۆمسیۆنی باڵای هەڵبژاردنەكانی عێراق، پێشتر ئەو داوایەی لە هێز و لایەنە سیاسیەكانی دیكەش كردوە و كۆنگرەیان بەستوە.


وتیشی: هەنگاوەكانی ئێستامان كردوە بە دوو قۆناغ، قۆناغی یەكەم بەستنی ئەم كۆنفرانسە ئیستسنائیەیە بۆ بیناكردنەوەی گۆڕان بە داڕشتنی پەیڕەو و پڕۆگرامێك كە هەم رەنگدانەوەی ویست و بۆچوونی زۆرینەی هەڵسوڕاوانی گۆڕان بێت هەم لەگەڵ رێنماییەكانی كۆمیسیۆنی هەڵبژاردنەكانی عێراق یەكبگرێتەوە.


هەروەك ئاماژەی بەوەشكرد گەنجان و ئافرەتان دەبێت بۆ قۆناغی نوێ ئەولەویەت بن لە بزوتنەوەی گۆڕاندا چ لە روی كاركردن بۆ پشتگیریكردن و جێبەجێكردنی خواست و داواكارییەكانیان چ بۆ بەشداریكردنیان لە هەیكەلیەت و ئۆرگانەكان.