روانگەی سوری بۆ مافەکانی مرۆڤ ئاشكرایكرد، لەماوەی کەمتر لە (48) كاتژمێری رابردودا دو هاوڵاتی مەدەنی شەهید بون و (25) ئەندام لە گروپە چەكدارەكانی نزیك توركیا كوژراون.


هەواڵ: (KNNC)


ئەمڕۆ سێشەممە، روانگەی سوری بۆ مافەکانی مرۆڤ رایگەیاند: لەكاتی روبەڕوبونەوەیان لەگەڵ هێزەكانی سوریای دیموكرات (هەسەدە)، (25) ئەندامی گروپە چەكدارەكانی نزیك لە توركیا لەناوچە جیاجیاكانی رۆژهەڵاتی شاری حەلەب، کوژران، هاوكات لەكاتی هێرشی فڕۆكە جەنگییەكانی توركیا بۆسەر گوند و ناوچە نزیكەكانی بەنداوی تشرین، دو هاوڵاتی مەدەنی شەهیدبون.


رۆژی دوشەممە، دوای هێرشكردنە سەر بەنداوی تشرین لەلایەن گروپە چەكدارەكانی سەر بەتوركیا، لەلایەن هەسەدە و بەبەكارهێنانی فڕۆكەی بێفڕۆكەوان (12) ئەندامی ئەو گروپە لە رۆهەڵاتی حەلەب كوژراون.


لە ئێوارەی رۆژی یەکشەممە، بەفڕۆكەی بێفڕۆكەوان هێزەكانی سوریای دیموكرات هێرشیان كردە سەر گروپە چەكدارەكانی توركیا و لەئەنجامدا هەشت ئەندانی ئەو گروپە لە دەوروبەری بەنداوی تشرین لە رۆژهەڵاتی حەلەب كوژران.


لەئەنجامی هێرشەكانی توركیا و بەمەبەستی پێشكەشكردنی هاوكاری بۆ چەكدارانی نویك ئەو وڵاتە، لە میحوەری بەنداوی تشرین و پردی قەرە قۆزاک لە لادێکانی ڕۆژهەڵاتی حەلەب سوپای توركیا تۆپبارانی سەختی دەستپێكرد، بەڵام لەلایەن هێزەكانی (هەسەدە)ـوە وەڵام درانەوە لەگەڵ ئەوەی نەیانتوانی هیچ بەرەوپێشچونێك تۆمار بكەن، هەسەدە زیانی سێ زرێپۆش و دو تانكیان لە توركیا و گروپەكانی نزیك لەئەو وڵاتە گەیاند.


روانگەی سوری بۆ مافەکانی مرۆڤ ئاماژەی بۆ ئەوەشكردوە، لە رۆژی (12ـی كانونی دوەمی 2024)ـوە تا ئێستا (46) هاوڵاتی مەدەنی شەهید بون كە لەنێوانیاندا شەش ژن و دو بونیان هەیە، هەروەك ئەوەشی خستوەتەڕو، لەهەمان ماوەی دیاریكراودا (338) ئەندام لە گروپە چەكدارەكانی نزیك توركیا كوژراون.