ئاگر لە هۆتێلێکى گەشتیاریی خلیسکانێی سەر بەفر لە ئەنادۆڵى تورکیا کەوتەوە و بەهۆیەوە زیاتر لە 40 کەس بونە قوربانیی و تا ئێستاش هۆکارى کەوتنەوەى ئاگرەکە ئاشکرا نەکراوە.

هەواڵ:KNNC

ئاگرەکە کاتژمێر 3:30 خولەکى بەیانى ئەمڕۆ کەوتوەتەوە، لە هۆتێلێکى بەناوبانگى تایبەت بە خلیسکانێی سەر بەفر لە پارێزگاى بۆلۆى ئەنادۆڵ کەوتوەتەوە و زۆر بە خێرایی تەشەنەى سەندوە.

لەبارەى زیانەکانەوە، عەلى یەرلى کایان وەزیرى ناوخۆى تورکیا لە تۆڕى کۆمەڵایەتی ئێکس نوسیویەتى:" ئاگرەکە زۆر بەخێرایی تەشەنەى سەندوە و بەشێکى زۆرى هۆتێلەکەى گرتوەتەوە کە دەکەوێتە لوتکەى چیاى کۆر ئۆغڵو".

ئاماژەى بۆ ئەوەشکراوە کە لەگەڵئەوەى بەخێرایی تیمى بەرگرى شارستانى و تیمە پزیشکى و فریاگوزارییەکان گەیشتونەتە شوێنى روداوەکە، بەڵام بەهۆیەوە 10 کەس گیانیان لەدەستداوە و 32 کەسى دیکەیش بریندار بون.

میدیاکانى تورکیا ئەوەشیان ئاشکرا کردوە کە جگە لە زیانە زۆرە ماددیەکان، زیانێکى زۆر گەورەش بەر هۆتێلەکە کەوتوە و بەشێکى زۆرى وێران بوە و تا ئێستاش هۆکار کەوتنەوەى ئاگرەکە ئاشکرا نەکراوە.