حەیان عەبدولغەنى، وەزیرى نەوتى عێراق رایگەیاند، پێویستە هەرێمی کوردستان رۆژانە 300 هەزار بەرمیل نەوت رادەست بکات و لە ڕێگەی کۆمپانیای سۆمۆوە هەناردە بکرێت.

هەواڵ:KNNC

ئەمڕۆ دوو شەممە، وەزیری نەوتی عێراق بە ئاژانسى فەرمى عێراقى راگەیاندوە؛ دەست بە ڕێکارەکانى ڕادەستکردنى نەوتى هەرێم بە کۆمپانیاى سۆمۆ کراوە و بۆ ئەو مەبەستەش، نوسراوێکی فەرمییان ئاراستەی حکومەتی هەرێم کردوە.

حەیان عەبدولغەنى ئاماژەی بەوەشکردوە، توانایان هەیە نەوتی هەرێم وەربگرن و لە ڕێگەی کۆمپانیای سۆمۆوە هەناردەی دەرەوەی بکەن.

 وەزیری نەوتی عێراقى جەختی کردوەتەوە؛ کە نابێت ئەو نەوتەی هەرێم رادەستی دەکات رۆژانە لە 300 هەزار بەرمیل کەمتربێت و لەبارەی قەرزەکانی سەر هەرێمی کوردستانیش وتویەتی؛ لەسەر ئەو بابەتەش ڕێکەوتنی تر لە نێوان هەردولادا دەکرێت.

دوێنێ یەکشەممە، ئەنجومەنی نوێنەرانی عێراق، هەمواری یاسای بودجەی هەر سێ  ساڵی (2023، 2024 و 2025)ـی پەسندکرد، کە تێیدا ماددەی 12 تایبەت بو،  بە دۆسیەی بەرهەمهێنان و گواستنەوەی نەوتی هەرێمی کوردستان.