سەرۆكی هەرێمی كوردستان رایدەگەیەنێت: له‌ نزيكه‌وه‌ چاودێريى دۆخى مامۆستايان و فه‌رمانبه‌رانى مانگرتو ده‌كات و دەڵێت: چاره‌سه‌ركردنى كێشه‌ى موچه‌ و شايسته‌ دارايييه‌كانى هه‌رێمى كوردستان داوايه‌كى ره‌وايه‌ داواشیان لێدەكات ره‌چاوى بارى ته‌ندروستييان بكه‌ن و ده‌ست له‌ مانگرتن هه‌ڵبگرن.

هەواڵ: (KNNC)

نێچیرڤان بارزانی، سەرۆكی هەرێمی كوردستان بڵاویكردەوە؛ له‌ نزيكه‌وه‌ چاودێريى دۆخى مامۆستايان و فه‌رمانبه‌رانى مانگرتو ده‌كات كه‌ ماوه‌ى چه‌ند ڕۆژێكه‌ له‌ سلێمانى بۆ داواى چاره‌سه‌ركردنى كێشه‌ى موچه‌، مانيان له‌ خواردن گرتوه‌، چاره‌سه‌ركردنى كێشه‌ى موچه‌ و شايسته‌ دارايييه‌كانى هه‌رێمى كوردستان داوايه‌كى ره‌وايه‌ و پشتگيريیان ده‌كات.


رونیكردوەتەوە، بۆ ئەو‌ مه‌به‌سته‌، له‌ سه‌رۆكايه‌تى و حكومه‌تى هه‌رێمى كوردستان هه‌وڵێكى زۆریان له‌گه‌ڵ حكومه‌تى فيدراڵى داوه، هه‌ر لەو چوارچێوه‌يه‌دا و له‌ ئه‌نجامى گفتوگۆ و لێكگه‌يشتنى هه‌ردولا و به‌ هاوكاريى لايه‌نه‌ په‌يونديداره‌كان، هه‌موارى ياساى بودجه‌ى گشتيى فيدراڵى په‌سه‌ند كرا و ئومێدى چاره‌سه‌رى يه‌كجاريى پرسی‌ موچه‌ و شايسته‌ داراييه‌كانى هه‌رێمى كوردستان هه‌يه‌.

سەرۆكی هەرێمی كوردستان ئاماژە بۆ ئەوەشكردوە، په‌يام و داواكاريى مامۆستايان و موچه‌خۆران به‌گشتی، به‌ ته‌واوى به‌ لايه‌نه‌ په‌يوه‌نديداره‌كان گه‌يشتوه‌، بۆيه‌ داوايان لێ ده‌كات ره‌چاوى بارى ته‌ندروستييان بكه‌ن و ده‌ست له‌ مانگرتن هه‌ڵبگرن. هه‌مو لايه‌ك دڵنيا ده‌كه‌ينه‌وه‌ که‌ هه‌رێمى كوردستان له‌ هه‌وڵه‌كانى به‌رده‌وام ده‌بێت بۆ چاره‌سه‌ركردنى ته‌واوى كێشه‌كان له‌گه‌ڵ حكومه‌تى فيدراڵى عێراق.