بە بڕیاری عەلی خامنەیی، رێبەری کۆماری ئیسلامی ئێران، زیاتر لە دو هەزار و 600 کەس لە زیندانیانی ئەو وڵاتە بەر لێبوردنی گشتی و کەمکردنەوەی سزا کەوتن و سزای لە سێدارەدانی 29 کەسیش هەڵوەشێندرایەوە.

هەواڵ:KNNC


ئەمڕۆ لە ئێران و بەشێکی رۆژهەڵاتی کوردستان یەکەمین رۆژی جەژنی قوربانە و بەو بۆنەیەوە ناوەندی راگەیاندنی نوسینگەی رێبەری  ئێران لە راگەیێندراوێکدا بڵاویکردەوە، عەلی خامنەیی بە بۆنەی جەژنی قوربانەوە بڕیاری لێبوردنی گشتی و کەمکردنەوەی سزای بۆ دو هەزار و 654 زیندانی دەرکردوە.

سادق رەحیمی، جێگری سەرۆکی دەسەڵاتی دادی ئێرانیش ئەمڕۆ رایگەیاند، دوای ناردنی لیستی ناوی زیندانیان، عەلی خامنەیی رەزامەندی لەسەر کەمکردنەوە، گۆڕینی سزا و ئازادکردنی ژمارەیەک زیندانی داوە.

رەحیمی وتیشی، سزای لەسێدارەدانی 29 کەسیش هەڵدەوەشێتەوە و سزاکەیان بە زیندانیکردن دەگۆڕدرێت.