وەزیری دەرەوەی ئیسرائیل لە وەڵامی هەڕەشەکانی، ڕاوێژکاری فەرماندەی سوپای پاسدارانی ئێران کە وتبوی ئیسرائیل تەختی زەوی دەکەین، دەڵێت فەرمون ئێمە ئامادەین بۆ ئەو شەڕە.

هەواڵ:KNNC

ئەمڕۆ هەینی، وەزیری دەرەوەی ئیسرائیل، گیدۆن سار لە تۆڕی کۆمەڵایەتی ئێکس وەڵامی هەڕەشەکانی ئیبراهیم جبوری، ڕاوێژکاری فەرماندەی سوپای پاسدارانی داوەتەوە و نوسیویەتی؛ هەمو کات ئامادەین بۆ شەڕی ئێران.

ئەو وەزیرەی ئیسرائیل نوسیویەتی، ئەگەر گەلی جولەکە شتێک لە مێژوەوە فێربوبێت، ئەوە ئەمەیە؛ کاتێک دوژمنەکەت دەڵێت ئامانجی من لەناوبردنی تۆیە - باوەڕی پێبکە".

گیدۆن سار جەختیشیکردوەتەوە وەک ئیسرائیل باوەڕ بە هەڕەشەکانیان دەکەین، بۆ هەر ئەگەر و پێشهاتێکیش ئامادەین ، بە ئێرانیش دەڵێین فەرمون.

ئەمە لەکاتیكدایە، بەردەوامی هەڕەشەکانی ئیسرائیل و ئێران لە یەکتری، ئەگەری پێکدادانی دو وڵاتەکەی زیاتر کردوە.

دوای هەڕەشەکانی نەتانیاهۆ، لەم دوایەدا ڕاوێژکاری باڵای فەرماندەی سوپای پاسدارانی ئێران،  ئیبراهیم جبوری رۆژی پێنجشەممە ڕایگەیاند: هەر کاتێک لەسەروخۆمانەوە بڕیار بدرێت، ئۆپەراسیۆنی ‘بەڵێنی ڕاستەقینەی سێ ’ بۆ لەناوبردنی تەلئەبیب و تەختکردنی ئیسرائیل لەگەڵ زەویدا  ئەنجام دەدرێت.