وتەبێژى دەزگاى لوتکە بۆ کاروبارى ئاوارە و پەنابەران ئاشکرایدەکات، لە روداوى تێکشانى دوو یەختى کۆچبەراندا لە باشورى ئیتاڵیا 17 کەس گیانیان لەدەستداوە و 60 کەسیش بریندارن، دەڵێت: ژمارەیەکى زۆر منداڵ لەنێو قوربانییەکاندان.

هەواڵ:KNNC

باهۆز بەرزان، وتەبێژى دەزگاى لوتکە بۆ کاروبارى ئاوارە و پەنابەران بە کەى ئێن ئێن،ى راگەیاند: دوو یەختى کۆچبەران لە کەناراوەکانى باشورى ئیتاڵیا تێکشاون و بەپێی ئامارە سەرەتاییەکان 17 کەس گیانیان لەدەستداوە و زیاتر لە 60 کەسیش بێسەروشوێنن کە لەنێویاندا ژمارەیەکى زۆر منداڵ هەیە.

ئاماژەى بۆ ئەوەکردوە کە لە یەختى یەکەمدا 51 کۆچبەر هەڵگیراونەتەوە کە 10 کەسیان گیانیان لەدەستدابو، سەرنشینانى یەختەکەش کۆچبەری  سوریا و میسر و پاکستان و بەنگلادیش بون.

لە یەختى دوەمدا و بەپێی زانیارییەکانى دەزگاى لوتکە کە بۆ کەى ئێن ئێن ئاشکرایکردوە؛ ئەو یەختە هەشت رۆژ پێش ئێستا لە تورکیاوە بەڕێکەوتوە و پێدەچێت بەهۆی بەهێزی شەپۆلەکانەوە تێکشکابێت و سەرنشیانانى ئەم یەختە هاوڵاتیی عێراق و ئێران و سوریا بون.

باهۆز بەرزان ئەوەشى راگەیاند کە رزگاربوانى ئەم نوقمبونى یەختە ئەوەیان وتوە کە تا ئیستا 66 کەس بێسەروشوێنن، لەنێویاندا 26 منداڵ هەیە  هەندێکیان زۆر گەنجن و هیچ بەلەمێکیش ئامادە نەبوە هاوکارییان بکات.