سوپای ئیسرائیل فەرمانیکرد بە چۆڵکردنی ناوچەکانی لوبنان، بەمەبەستی ئەنجامدانی هێرشی چڕوپڕ بۆسەر چەکدارانی حیزبوڵای لوبنان.

هەواڵ:KNNC

بەرەبەیانی ئەمڕۆ هەینی سوپای ئیسرائیل رایگەیاند، دەبێت دانیشتوانی گوندەکانی، ئەلتەیبە و ئەدشیت ئەلقسەیر و دێر ساریان لە باشوری لوبنان و ناوچەکانی ئەلمەعشوق و بورج ئەلشەماڵی لە قەزای تیر و ناوچەی ئەلحەدات، چۆڵی بکەن، وەک ئامادەکارییەک بۆ بۆردومانکردنی ئەو ناوچانە.

هۆشدارییەکەی سوپای ئیسرائیل لەکاتێکدایە، فڕۆکە جەنگییەکانی وڵاتەکە ئەمڕۆش بەردەوامن لە هەڵمەتە چرەکانیان بۆسەر ناوچەکانی بەیروت، بەهۆیەوە دەیان کوژراو و برینداری لێکەوتەوە.

لە بەرامبەردا حیزبوڵای لوبنان رایگەیاند، تانکێکی مێرکاڤای ئیسرائیلییان لە دەوروبەری قەڵای شاما تێکشکاندوە و چەندین سەرباز کوژراون و برینداربون.

هاوکات، وەزارەتیە تەندروستی لوبنان رایگەیاند، بەهۆی هێرشەکانی ئیسرائیل بۆسەر 10 گوندی جیاواز لە رۆژهەڵاتی لوبنان 40 کەس کوژراون و 52 کەسیش برینداربون، هەروەها لە زنجیرەیەک هەڵمەتی جیاوازدا بۆسەر باشوری لوبنان 12 کەس کوژران و 50 کەسیش برینداربون.

هێرشەکانی ئیسرائیل بۆسەر پێگەی چەکدارانی حیزبوڵا لە بەرەبەیانی رۆژژی سێشەممەوە راگیرابو، ئەوەش بەهۆی چونی نوێنەری ئەمەریکا بەرەوئیسرائیل بەمەبەستی نێوەندگیری و راگەیاندنی ئاگربەست لەنێوان هەردولادا.