لە گوندێكی قەزای حەویجە دەست بەسەر ژمارەیەك موشەك پشتێنەی تەقینەوەی داعشدا گیرا.

هەواڵ: (KNNC)

میدیا عێراقییەكان بڵاویانكردەوە؛ لەسەر بنەمای زانیاریی هەواڵگری دروست، لە گوندی عەریشەی سەر بەقەزای حەویجە، هێزێکی لیوای (61)ـی سەر بە فەرماندەیی ئۆپەراسیۆنەکانی باکور و رۆژهەڵاتی دیجلە توانیویانە لە باشوری رۆژئاوای پارێزگای کەرکوک، دەست بەسەر موشەک و پشتێنەی تەقینەوەی رێكخراوی"داعش"ـدا بگرن.

رونیانكردوەتەوە، هێزە عێراقییەكە دەستیان بەسەر ژمارەیەک موشەکی کاتیۆشا و پشتێنەی تەقینەوەدا گرتوە كە  خاوەندارێتیان بۆ رێكخراوی تیرۆریستی داعش دەگەڕێتەوە.

میدیا عێراقییەكان ئاماژەیان بۆ ئەوەكردوە، هەمو ئەو موشەک و ئامێرانەی دەستیان بەسەردا گیراوە، لەلایەن تیمە تایبەتمەندەکانی فەرماندەی ئۆپراسیۆنەكانەوە مامەڵەیان لەگەڵدا کراوە، دڵنیابونەتەوە لە سەلامەتی هاوڵاتیان و پارێزگاری كردن لە ئاسایشی ناوچەکە.

هاوكات، فەرماندەیی ئۆپەراسیۆنە هاوبەشەکان بڵاویكردەوە، فەرمانگەی هەواڵگری سەربازی، بەهەماهەنگی و هاوکاری لەگەڵ فەرماندەیی ئۆپەراسیۆنە هاوبەشەکان، بەبەکارهێنانی فڕۆکەی (F16) هێرشێكی ئاسمانی بكاتە سەر دۆڵی زاغیتون لە كەركوك و دو ئەندامی رێكخراوی داعش بەئامانج بگرن.