دۆناڵد ترەمپ رایگەیاند، گفتوگۆکانیان لەگەڵ ئێران زۆر بەباشی بەڕێوەدەچن و هیچ شتێک گرنگ نییە تا گفتوگۆکان کۆتاییان دێت.

هەواڵ:KNNC

لەیەکەم لێدوانیدا سەبارەت بە دانوستانەکەی رۆژی شەممە کە لە نێوان ئەمەریکا و ئێران بەڕێوەچون، دۆناڵد ترەمپ رایگەیاند، "پێموایە بە باشی دەڕوات، هیچ شتێک گرنگ نییە تا گفتوگۆکان کۆتاییان دێت، بۆیە حەز ناکەم باسی بکەم".

وتیشی: پێموایە كارەكان لەگەڵ ئێران زۆر باش بەڕێوەدەچن.

کۆشکی سپی رۆژی شەممە رایگەیاند، ستیڤ ویتکۆف، نوێنەری ئەمریکا لەگەڵ عەباس عەراقچی، وەزیری دەرەوەی ئێران گفتوگۆیەکی زۆر ئەرێنی و بونیادنەر ئەنجامداوە.

ئاماژەی بەوەشكرد: ویتکۆف دڵنیایی داوەتە عێراقچی کە رێنمایی لە ترەمپ وەرگرتوە بۆ چارەسەرکردنی ناکۆکییەکانی نێوان هەردوو وڵات لە رێگەی دیالۆگ و دیپلۆماسییەوە، ئەگەر بكرێت.

لەبەرامبەردا عەباس عەراقچی، وەزیری دەرەوەی ئێران وتی: دانوستانە ناڕاستەوخۆکانی نێوان لایەنی ئەمریکی و ئێرانی بنیاتنەر بون و لە کەشێکی هێمن و ڕێزداردا ئەنجام دراون.

وتیشی: هەردوو شاندەکە لە کاتی جێهێشتنی شوێنی دانوستانەکان بۆ ماوەی چەند خولەکێک قسەیان ئاڵوگۆڕ کرد. ئەمریکییەکان داوای کرد کۆبونەوەکان ڕاستەوخۆ و ڕوبەڕو بن.