شەپۆلێکی ناوبەناوی باران هەرێمی کوردستان و ناوچەکانی گەرمیان به بڕی جیاواز دەگرێتەوە.


هەواڵ: (KNNC)


سیروان ساڵح، كەشناس رایگەیاند: بەپێی پێشبینییەكانی كەشوهەوا و بەهۆی کاریگەری ناوچەیەکی پەستان نزمی دەریای ناوەڕاست و ناوچەیەکی پەستان نزمی لاوازی دەریای سور، لەڕۆژانی پێنجشەممە و هەینییەوە هەندێك کات ئەگەری بارانبارین بەبڕی جیاواز هەیە و بۆ ڕۆژی شەممە کەش وهەوا جێگیر دەبێتەوە.


وتیشی: سبەینێ چوارشەممە لە نێوان کاتەکانی نیوەڕۆ تا دوای عەسر، ئەگەری هەیە كە بای شور بەخێرایی (20 تا 45) کیلۆمەتر/ لە کاتژمێرێکدا چالاك ببێت، كە پێدەچێت كاریگەرییەكانی لەنێوان مامناوەند بۆ بەهێز لە سنوری گەرمیان بێت و بەهۆیەوە  تەپوتۆزی ناوخۆیی بۆماوەیەکی کاتی لەگەڵ بێت.


سیروان ساڵح-ی كەشناس ئاماژەی بۆ ئەوەشكردوە، لەڕۆژی پێنجشەممەوە پلەکانی گەرمی (6 بۆ 8) پلە دادەبەزن كە بەڕۆژ فێنک و بەشەو سارد دەبێت، هەروەها لە ئێوارەی پێنجشەممە و هەندێك کاتی رۆژی هەینی، لە زنجیره چیاکانی بەرزتر لە (2500) مەتر ئەگەری بەفربارین هەیە.