دەستەی ژینگەی هەرێمی كوردستان رایدەگەینێت: بەمەبەستی بەرزکردنەوەی ئاستی ھۆشیاری ژینگەیی تاکەکانی کۆمەڵگا و پاراستنی زەوی، چالاكی کاتژمێری زەوی ئەنجام دەدات كە خۆی لە كوژاندنەوەی سەرجەم گڵۆپ و ئامێرەكانی دیكەی روناككردنەوە بۆ ماوەی یەك كاتژمێر دەبینێتەوە.


هەواڵ: (KNNC)


دەستەی پاراستن و چاککردنی ژینگەی هەرێمی كوردستان بڵاویكردەوە، چالاکی کاتژمێری زەوی كە چالاکییەکی جیھانیيە و بەبەشداری زیاتر لە (150) وڵات، لەکۆتا رۆژی شەممەی مانگی ئازار لە کاتژمێر (08:30)ـی شەو ئەنجامدەدرێت، ئه‌مساڵیش هەر وەكو ساڵانی پێشو له‌ هه‌رێمی كوردستان چالاكییەكە ئه‌نجام ده‌درێتەوە.


دەستەكە دەڵێت: چالاكییه‌كه‌ش خۆی له‌ كوژراندنه‌وه‌ی ته‌واوی گڵۆپ و روناككه‌ره‌وه‌كاندا بۆ ماوه‌ی یه‌ك كاتژمێر، ده‌بینێته‌وه‌، بۆ یه‌كه‌مجاریش ئه‌و چالاكییه‌ له‌ ساڵی (2007) شاری سیدنی ئوسترالیا به‌ڕێوه‌چو، به‌ڵام ئێستا له‌ زیاتر له‌ حەوت هه‌زار شار و له (172) وڵاتی جیهان به‌ڕێوه‌ده‌چێت.


دەستەی پاراستن و چاککردنی ژینگەی هەرێمی كوردستان ئاماژەی بۆ ئەوەشكردوە، مه‌به‌ست له‌و چالاكییه‌ بۆ دروستکردنی پردی پەیوەندیی لە نێوان مرۆڤ و ژینگەکەيه‌تی لەجیھاندا، هەروەها بۆ ئەوەی ببێتە ھۆی بەرزکردنەوەی ئاستی ھۆشیاری ژینگەیی تاکەکانی کۆمەڵگا و پاراستنی زەوی.