لەسەر سکاڵایەکی تایبەت بەپێی خشتەی دادگا، رۆژی سێشەممە دادگای باڵای فیدراڵی عێراق کۆدەببێتەوە و بڕیار له‌سه‌ر رێگرییەکانی بەردەم هێنانی ژنی دوەم دەدات لە هەرێمی کوردستان

هەواڵ:KNNC

به‌پێی ئه‌و خشته‌یه‌ى له‌ ماڵپه‌ڕی دادگاکەدا بڵاوکراوەتەوە، لەم هەفتەیەدا و رۆژى سێشه‌ممه‌ كۆبونه‌وه‌ بۆ چه‌ند سكاڵا و بابه‌تێك ئه‌نجام ده‌دات، یەکێک لەو سکاڵایانە كه‌ لە هەرێمی کوردستان پێشكه‌شی كراوه‌ و هاوڵاتییه‌كی هه‌رێمی كوردستانه‌ به‌ ناوى ئیسماعیل حه‌مه‌عه‌لی عه‌بدولقادر كه‌ له‌ دژی سەرۆکی پێشوی پەرلەمانی کوردستان تۆمارى كردوه‌.

لە سکاڵاکەیدا هاوڵاتییه‌كه‌ داوای ئەوە دەکات،  بڕیاری نادەستوریبونی بڕگەی (دوەم / أ) لەماددەی یەکەمی یاسای ژمارە 15ـی ساڵى 2008ـی هەمواركراوى یاسای بارى کەسی لەلایەن دادگاکەوە بدرێت كه‌ باس له‌ ره‌زامه‌ندى ژنى یه‌كه‌م له‌به‌رده‌م دادگا ده‌كات بۆ ئه‌وه‌ى هاوسه‌ره‌كه‌ى ژنى دوه‌م بهێنێت و له‌ بری ئەو یاسای بارى كه‌سیی ژماره‌ 188 له‌ ساڵى 1959 جێبه‌جێ بكرێت.

ئەم سکاڵایە لە رابردودا تۆمارکراوە، کاتی سکاڵاکە بۆ ساڵی پار دەگيڕێتەوە کە لە  2-11-2024  تۆمارکراوە و لەلایەن دادگاوە دواخراوە.

لەو  هەموارەی كه‌ پێشتر هەرێمی کوردستان ئەنجامیداوە، مەرجە ژن رەزامەندی دەرببڕێت تاوەکو مێردەکەی بۆ جارى دوەم  بتوانێت هاوسەرگیری بکاتەوە وئەو کەسەی سکاڵاکەی کردوە، دەیەوێت ئەم مەرجە لاببرێت و کارئاسانی زیاتر بکرێت بۆ هێنانی ژنی دوەم.