بەهۆى تێکەڵبونى مادەى زیانبەخش بە ئاوى زێى بچوک، سەرجەم پڕۆژەکانى بەرهەمهێنان و دابینکردنى ئاو لە کۆیە وەستێنران.

هەواڵ:KNNC

بەڕێوەبەرایەتی ئاوی کۆیە بڵاویکردەوە، بەهۆی تێكەڵبوونی مادەی زیان بەخش بەئاوی زێیی بچوك كە سەرچاوەی دابینكردنی ئاوە بۆ سەنتەری قەزای كۆیە و تەق تەق و ناحیەی ئاشتی بەشێك لە گوندەكان، بەمەبەستی پاراستنی ژیانی هاوڵاتیان سەرجەم ئەو پرۆژانەی ئاو لە زێی بچووک وەردەگرن بە ناچاری وەستێنران.

دەشڵێت: ئاوەکە شیاوى خواردن و بەکارهێنان نەبوە، بۆیە ناچاربون پڕۆژەکان بوەستێنن.

داواشدەکات، هاوڵاتیان بە وشیارییەوە ئاو بەکار بهێنن تا ئەو کاتەی زێی بچووک پاک دەبێتەوە.

دیجیتاڵ میدیای کەی ئێن ئێن زانیویەتی: دوو تانکەر پاشماوەی گازییان کردوەتە ناو ئاوی زێی بچوک لە گوندی کانیبی، بەهۆیەوە ئاوەکە ژەهراوی بوە و ماسییەکان مردون، شۆفێری تانکەرەکانیش دەستگیرکراون.

رۆژانە بەڕێوەبەرایەتیى ئاوى کۆیە، تەنیا لە سەنتەرى شاردا 38 هەزار مەتر سێجا ئاوى خواردنەوە لەسەر 18 هەزار و 700 هاوبەشى ئاودا دابەش دەکات.