بەرەبەیانی ئەمڕۆ، لەکاتی گەڕانەوەیان لە یاری تۆپی پێ، 15 یاریزانی گەنج توشی روداوێکی هاتوچۆبون و بەهۆیەوە یەکێک لە یاریزانەکان گیانی لەدەستدا.

هەواڵ:KNNC

سەرچاوەیەک بە دیجیتاڵ میدیای KNNـی راگەیاند، کاتژمێر (3:00)ـی بەرەبەیانی ئەمڕۆ ژمارەیەک یاریزان دوای تەواوبونیان لە یاری تۆپی پێ، بەمەبەستی گەڕانەوەیان بۆ ماڵەوە چونەتە ناو دوو ئۆتۆمبێلەوە، بەڵام لەسەر رێگای قەلاتگە- سێبیران لە سنوری پارێزگای هەولێر، دوو ئۆتۆمبێلەکە توشی روداوی هاتوچۆ بون.

وتیشی: سەرجەم بریندارەکان گەیەنراونەتەوە نەخۆشخانەی فریاکەوتنی رۆژئاوای هەولێر، گەنجێک بەناوی (عەلی سەفین) گیانی لەدەستدا و سەرجەم یاریزانەکانی دیکە برینداربون، کە دۆخی تەندروستی دوان لە بریندارەکان ناجێگیرە.

راشیگەیاند، هەر لە روداوەکەدا شۆفێری هەردو ئۆتۆمبێلەکە برینداربون.

محەمەد ئەحمەد- هەولێر