هەسەدە رایگەیاند، هێزەکانیانیان شەش فڕۆکەی بێفڕۆکەوانی تورکیایان خستوەتە خوارەوە، دەشڵێت: لە نێو گروپە چەکدارەکانی سەربە تورکیا چەندین کەس کوژراون و برینداربون.

هەواڵ:KNNC

هێزەکانی سوریای دیموکرات-هەسەدە- بڵاویکردەوە، هێرشێکی گروپە چەکدارەکانیان بۆسەر یەکێک لە خاڵە سەربازییەکانیان لە دەوروبەری بەنداوی تشرین پوچەڵکردوەتەوە و بەهۆی دروستبونی شەڕ و پێکدادان لەنێوان شەڕڤانان و گروپە چەکدارەکان سێ چەکدار کوژراون و دووانی دیکەش برینداربون.

ئاماژەی بەوەشکردوە، هێزەکانیان توانیویانە شەش فڕۆکەی بێفڕۆکەوانی گروپە چەکدارەکان بخەنە خوارەوە کە لە نێویاندا سێ فڕۆکەی بێفڕۆکەوانی خۆکوژی تێدابوە.

هەسەدە لە راگەیەنراوەکەیدا دەشڵێت: فڕۆکەی بێفڕۆکەوانی تورکیا بە درێژایی شەوی رابردو بەسەر ئاسمانی شاری کۆبانێ و شارۆچکەی عەین عیسا سوڕانەتەوە.