توپخانەکانی سوپای تورکیا بەچڕی گوندەکانی سنوری ئامێدی تۆپباران دەکەن، بۆردومانەکەش جگە لە زیانی ماددی هیچ زیانێکی گیانی لێنەکەوتوەتەوە.

هەواڵ:KNNC

کامەران عوسمان، ئەندامی تیمی (سی پی تی)ـی ئەمەریکی بە کەی ئێن ئێنی راگەیاند، لە کاتژمێر (1:45) خولەکی دوانیوەڕۆی ئەمڕۆوە، تۆپخانەکانی سوپای تورکیا چوار جار دەوروبەری گوندی (بەرچێ)یان لە دەڤەری نهێلێ لە قەزای ئامێدی سەر بە پارێزگای دهۆک تۆپباران کردوە.

وتیشی: هەر لە دوانیوەڕۆی ئەمڕۆدا و لە کاتژمێر (2:24) خولەکدا، تۆپخانەکانی تورکیا نۆ جار بۆردومانی گوندەکانی “مژێ، کەفنە مژێ، سپیندارێ و گرگاشێ”یان لە بەری گارە لە قەزای ئامێدی کردوە و خانوی دوو هاوڵاتی مەدەنییان خاپورکردوە.

بە وتەی کامەران عوسمان، بەتەنها لەمڕۆدا، تۆپخانەکانی تورکیا 13 جار تۆپبارانی گوندەکانی دەوروبەری قەزای ئامێدیان کردوە و هیچ هاووڵاتییەکی مەدەنی نەبوونەتە قوربانی.