بەهۆی توشبون بە تای خوێنبەربون، کارمەندێکی تەندروستی کەرکوک گیانی لەدەستداوە، لەمساڵدا ئەمە دووەم حاڵەتی گیانلەدەستدانە بەهۆی تای خوێنبەربونەوە تۆمارکرابێت.

هەواڵ:KNNC

سەرچاوەیەک لە نێو تەندروستی کەرکوک بە کەی ئێن ئێن ئێنی راگەیاند، بەیانی ئەمڕۆ شەممە بەهۆی توشبونی بە تای خوێنبەربون، کارمەندێکی نەخۆشخانەی فریاکەوتنی کەرکوک، گیانی لەدەستداوە.

وتیشی: ئەو کارمەندەی تەندروستی یەکێک بو لەو کەسانەی کە گومانی توشبونی بە نەخۆشییەکە لێدەکرا و خرابوە ژێر چاودێری وردی پزیشکییەوە.

بەپێی زانیارییەکانی دیجیتاڵ میدیای کەی ئێن ئێن، ئەو کارمەندەی تەندروستی ناوی یادگار نورییە و تەمەنی 24 ساڵە و کارمەندی نەخۆشخانەی فریاکەوتنی کەرکوکە.

بەپێی ئامارەکان، لەمساڵدا چوار کەس لە کەرکوک توشی تای خوێنبەربون بون و بەهۆیەوە دوو کەسیان گیانیان لەدەستداوە.

تای خوێنبەربون، نەخۆشییەکی ڤایرۆسییە و زیان بە ملولە خوێنەکان دەگەیەنێت و دەبێتەهۆی خوێنبەربونی، بەگشتی نیشانەکانی نەخۆشییەکە دەتوانین بە ئازاری جەستە و بێهێزی جیای بکەینەوە، هەروەها لەرێگەی بەرکەوتن بە شلەی کەسی توشبو یان لەرێگەی پێوەدانی مێروەکانەوە دەگوازرێتەوە.

کەرکوک- ئۆژین جۆڵا