سبەینێ وەرگرتنی گەنمی جوتیاران لە سایلۆکانی هەرێمی کوردستان دەستپێدەکاتەوە و بەڕێوەبەری سایلۆی سلێمانیش دەڵێت: بەهۆی پشوەکانی جەژنەوە وەرگرتنی گەنم لە جوتیاران راگیرابو.

هەواڵ:KNNC

نەسرین ئەحمەد بەڕێوەبەری سایلۆی سلێمانی بە کەی ئێن ئێنی راگەیاند: راگرتنی وەرگرتنی گەنمی جوتیاران بۆ ماوەی دو ڕۆژ، بەهۆی پشووەکانی جەژنی قوربانەوە بوە.

وتیشی: سبەینێ لە سایلۆی پیرەمەگرون دەست بە وەرگرتنی گەنمی جوتیاران دەکرێتەوە و تا ئێستاش لە سنوری سلێمانی زیاتر لە 44 هەزار 375 تەن گەنم لە جوتیاران وەرگیراوە.

بەپێی ڕێککەوتنی نێوان حکومەتی هەرێمی کوردستان و عێراق ئەمساڵ بەغداد 700 هەزار تەن گەنمی هەرێمی کوردستان وەردەگرێت و لەو بڕەش 40٪ی پشکی جوتیارانی پارێزگای سلێمانییە کە دەکاتە 282 هەزار و 160 تەن گەنم  نرخی هەر تەنێکیش بە 850 هەزار دینار دیاریکراوە.