بەڕێوەبەری گشتی پەروەردەی سلێمانی داوا دەكات، بۆ ئەوەی کەشێکی فێنک لەم گەرمای هاوینەدا بۆ هۆڵەکانی تاقیکردنەوە دابین بكرێت لە كاتژمێر (07:30 بۆ 11:30) پێش نیوەڕۆ بەکارهێنانی کارەبا کەمبکرێتەوە  تا کۆششی چەندین ساڵەی خوێندکاران بە ئامانجەکەیان بگەن.

هەواڵ: (KNNC)

لەبڵاوكراوەیەكدا دڵشاد عومەر، بەڕێوەبەری گشتی پەروەردەی سلێمانی رایگەیاند: بە هەوڵی هەموان، پرۆسەی پەروەردەی ئەمساڵ بە کۆتا گەیشت، ئەوەی بۆ ئەمساڵی خوێندن مابێت؛ پرۆسەیەکی گرنگی تاقیکردنەوە گشتییەکانی پۆلی دوانزەی ئامادەییە بە هەمو بەشەکانییەوە بۆ هەردو خولی یەکەم و دوەم.

رونیكردوەتەوە، بۆ خولی یەکەم (29) هەزار قوتابی و خوێندکار کە بەسەر (423) هۆڵی تاقیکردنەوە دابەش کراون لە زۆربەی ناوچەکانی سنوری پارێزگاکەمان، رۆژی یەکشەممە (2024/6/23) لە كاتژمێر (07:30)ـی بەیانی یەکەم تاقیکردنەوە دەست پێ دەکات، بۆئەوەی کەشێکی فێنک لەم گەرمای هاوینەدا بۆ هۆڵەکانی تاقیکردنەوە دابین بکەین و لە هەوڵەکان سەرکەوتو بین پێویستمان بە هاوکاری هەمو لایەکتانە.


بەڕێوەبەری گشتی پەروەردەی سلێمانی داوا دەكات، لە ڕۆژانی یەکشەممە و چوارشەممەدا، كە پرۆسەی تاقیكردنەوەی تێدا ئەنجام دەدرێت،  بەکارهێنانی کارەبا کەمبکەینەوە بۆئەوەی کۆششی چەندین ساڵەی جگەرگۆشەی سنوری پارێزگاکەمان بگەیەنینە ئەو ئەنجامەی کە چەندین ساڵە هەموان چاوەڕێی دەکەین.



راشیگەیاندوە: بەڕێوەبەرایەتی گشتی پەروەردەی سلێمانی هەمو هەوڵەکانی ئارامی هۆڵ و دابینکردنی کارەبامان لەگەڵ فەرمانگەکانی تایبەت بەو بوارە ئەنجام داوە، هاوکاری هاوڵاتیانی خۆشەویستی سنوری پارێزگای سلێمانی نەبێت سەرکەوتو نابین، بۆیە چاوەڕوانی بەدەمەوە هاتنی هاوڵاتیانی بەڕێزین.