ئەمڕۆ دوا رۆژی وەرزى قەدەغەی ڕاوەماسیە و لە ڕۆژی هەینیەوە ڕاوکردنی ماسی لە هەرێمی کوردستان دەستپێدەکاتەوە، ئەمڕۆش بەشێک لە ماسیگران دەستیان بە راوکردن کردوەتەوە و بڕیارە لە نیوەڕۆى ئەمڕۆوە ماسى بگاتە بازاڕەکان.

هەواڵ:KNNC


بەپێی راگەیەنراوێکى بەڕێوەبەرایەتیی سامانى ماسى سەربە وەزارەتی کشتوکاڵ و سەرچاوەکانی ئاوی ھەرێمی کوردستان، ئەمڕۆ 20ـی حوزەیران دوایین رۆژى وەرزی قەدەغەی راوکردنی ماسییە لە ھەرێمى کوردستان و ئەگەر وادەکەی درێژ نەکرێتەوە ئەوا سبەینێ ھەینی راوکردنی ماسی دەستپێدەکاتەوە.

ساڵانە لە 15ـی ئازارەوە بەھۆی دانانی گەرا و ھێلکە لەلایەن ماسییەکانەوە، راوکردنی ماسی لە ھەرێمی کوردستان بۆ ماوەی سێ مانگ و تا 15ـی حوزەیران قەدەغە دەکرێت، بەڵام ئەمساڵ بە بڕیارێک ماوەی پێنج رۆژ وادەکە درێژ کرایەوە و کرا بە 20ـی حوزەیران.

بەپێی بڕیارەکە ئەمڕۆ کۆتا وادەى قەدەغەى راوەماسییە و ماسیگران دەتوانن سەبینێ دەست بە راوی ماسی بکەنەوە، بەڵام بەشێک لە ماسیگران لەمڕۆوە دەستیان بە کارەکانیان کردوەتەوە و بڕیارە ئەمڕۆ ماسى بگاتە بازاڕەکان.