سکرتێرى گشتی نەتەوەیەکگرتوەکان داوا لەکۆمەڵگەی نێودەوڵەتی دەکات سەرزەنشتی تاوانکارییەکانی حەمLاس بکات و لەهەمان کاتیشدا داوای راگرتنی خوێنڕشتن لە لوبنان و غەززە دەکات.

هەواڵ:KNNC

لەگەڵ نزیکبونەوەى ساڵیادی هێرشی چەکداری بزوتنەوەی حەمماس بۆسەر ئیسرائیل ئەنتۆنیۆ گۆتێریس سکرتێرى گشتی نەتەوەیەکگرتوەکان رایگەیاند، ئێستا دەرفەتێکە بۆ کۆمەڵگەی نێودەوڵەتی بۆ ئەوەی بۆجارێکی تر بەدەنگی بەرز تاوانکارییەکانی بزوتنەوەی حەمماس شەرمەزار بکات بەتایبەتیش دەستبەسەراگرتنی بارمتەکان.

گۆتێرێس داواشی لە بزوتنەوەی حەمماس کرد بێ هیچ مەرجێک بارمتەکان ئازاد بکات و رێگەش بەخاچی سوری نێودەوڵەتی بدات چاوی بەبارمتەکان بکەوێت، هەروەها داواشى کرد جەنگ لە لوبنان و غەززە رابگیرێت.

رۆژی حەوتی تشرینی یەکەمی ساڵی 2023 چەکدارانی حەماس هێرشیان کردە سەر چەند ناوچەیەکی ئیسرائیل و بەو هۆیەشەوە زیاتر لە هەزار ئیسرائیلی کوژران و 251ى تریش وەک بارمتە دەست بەسەر کران، کە تائێستا 33یان کوژران و 97ی دیکەشیان بەدەستبەسەری ماونەتەوە و ئەوانی تریش ئازاد کراون.