نوسینگەی سودانی: لە كۆبونەوەی سەرۆك وەزیرانی عێراق و وەزیری دەرەوەی ئەمەریكا، دۆخی سوریا و ناوچەكە تاوتوێ كرا.


هەواڵ: (KNNC)

دوای گەیشتنی وەزیری دەرەوەی ئەمەریكا بۆ بەغداد، ئەنتۆنی بلینكن، لەگەڵ محەمەد شەیاع سودانی، سەرۆك وەزیرانی عێراق كۆبوە، نوسینگەی سودانیش بڵاویكردەوە: دۆخی سوریا و ناوچەكە و پەیوەندی دوقۆڵی نێوان  هەردو وڵات تاوتوێ كرا.

ئەوەیخستوەتەڕو، سەرۆک وەزیرانی عێراقی جەختی لە پشتیوانی کردنی سوریا كردەوە و وتی: بۆ دڵنیابون لە بەهێزکردنی وڵاتەكەیان و دەسبەرداركردنی سەقامگیری، پێویستە نوێنەرانی سەرجەم پێکهاتەکانی سوریا بەشداری لە بەڕێوەبردنی وڵاتدا بكەن.

لای خۆشیەوە، ئەنتۆنی بلینكن، وەزیری دەرەوەی ئەمەریکا جەختی لەسەر رێککەوتنی ئەمەریکا لەگەڵ عێراق كردەوە و ئاماژەی بەڕۆڵی سەرەکی عێراق لە ناوچەكەدا كرد و راشیگەیاند: پێویستە لە سوریا حكومەتێكی گشتگیر پێكبهێنرێت کە ڕەنگدانەوەی ئیرادەی گەلی سوریا بێت.


نوسینگەی راگەیاندنی سودانی ئاماژەی بۆ ئەوەكردوە، لە كۆبونەوەی نێوان سەرۆ وەزیرانی عێراق و وەزیری دەرەوەی ئەمەریكا، ئەنتۆنی بلینكن جەختی لەسەر پابەندبونی وڵاتەكەیی و هاوپەیمانی نێودەوڵەتی بەرامبەر بەئاسایش و سەروەری عێراق كردەوە.