فەرماندەی گشتیی هێزە چەكدرەكانی سوریا رایدەگەیەنێت: ئیدارە نوێی سوریا پەیوەندی لەگەڵ مەسیحییەکان و دروزەکان هەیە، و دەشڵێت: جیاوازی لەنێوان کۆمەڵگەی کوردی و رێکخراوی پەکەکە هەیە.


هەواڵ: (KNNC)


ئەحمەد شەرع، فەرماندەی گشتیی ئیدارەی نوێی سوریا، رایگەیاند: حکومەتی داهاتو لە سوریا هەڵبژاردن ئەنجام دەدات و  وەزارەتی بەرگری لە قۆناغی داهاتودا سەرجەم هێزە چەکدارەکان هەڵدەوەشێنێتەوە و هیچ چەکێک لەدەرەوەی دەسەڵاتی دەوڵەتی سوریا نامێنێت.


وتیشی: بۆ نوسینەوەی دەستور لیژنە و ئەنجومەنەکان پێکدەهێنرێن هەروەها فۆڕمی دەسەڵات بۆ بڕیاری پسپۆڕان و شارەزایانی یاسایی و گەلی سوریا جێدەهێڵرێت و توانا و لێهاتویی دەبێتە بنەمای كاركردن لە وڵات.


سەبارەت بە پێکهاتەکانی کۆمەڵگەی سوریا ئەحمەد شەرع ئاماژەی بۆ ئەوەشكرد، پەیوەندی لەگەڵ مەسیحییەکان و دروزەکان هەیە، كە ئەوانیش لەناو بەشی ئۆپەراسیۆنە سەربازییەکاندا شەڕیان کردوە، هەروەك وتوشیەتی: جیاوازی لەنێوان کۆمەڵگەی کوردی و رێکخراوی پارتی كرێكارانی كوردستان “پەکەکە” هەیە.