روانگەی مافی مرۆڤی سوریا ئاشکرایدەکات، ماهر ئەسەد خودی خۆی سەرپەرشتی سەرجەم کارگەکانی بەرهەمهێنانی ماددەی هۆشبەری کردوە، دەشڵێت: ئەو کارگانەی لەژێر سەرپەرشتی خۆیدا نەبون ناچارکراون باج بدەن.

هەواڵ:KNNC

روانگەی سوری بۆ مافەکانی مرۆڤ لە سوریا بڵاویکردوەتەوە، ماهر ئەسەد برای بەشار ئەسەدی سەرۆکی سوریا، کۆنتڕۆڵی بازرگانی ماددە هۆشبەرەکانی لە وڵاتەکە کردوە.

ئاماژەی بەوەشکردوە، ماهر ئەسەد راستەوخۆ و خودی خۆی سەرپەرشتی سەرجەم کارگەکانی بەرهەمهێنانی ماددەی هۆشبەری کردوە، ئەو کارگانەش کە راستەوخۆ لەژێر سەرپەرشتی خۆیدا نەبون، ناچارکراون باج و سزای دارایی بدەن.

کارگەکانی بەرهەمهێنانی ماددە هۆشبەرەکان، لە لادێکانی حومس و لازقیە و تارتوس بون، لەلایەن ئەندامانی بنەماڵەی ئەسەدەوە بەڕێوەدەبران.

هاوکات چەند سەرچاوەیەک بە روانگەکەیان راگەیاندوە، بازرگانی ماددە هۆشبەرەکان پێشتر لەژێر چاودێری راستەوخۆی حیزبوڵای لوبنان-ـدا بون و وەک سەرچاوەیەکی سەرەکی دارایی بەکاریانهێناوە، بەڵام ناکۆکییەکان وایکرد، بنەماڵەی بەشار ئەسەد کۆنتڕۆڵی بارودۆخەکە بکەن و حزبوڵای لوبنان بەتەواوی لە بازرگانییەکە دوربخەنەوە.

هەروەها، ئاسایشی فیرقەی چوار بەرپرسیار بوە لە پەرەپێدانی ناوخۆیی ماددە هۆشبەرەکان و گەیاندنیان بە بەکارهێنان و ساخکردنەوەی لە بازاڕدا، چونکە کارگەکانی تارتووس و لازقییە ناوەندی سەرەکی دروستکردنی بەرهەمهێنانی کاپتاگۆن بوون.

لەگەڵ ڕوخانی ڕژێمی پێشوودا، سیماکانی ئەم تۆڕە جیهانییە سەریان هەڵدا و کاریگەرییەکانی تەنیا لە ناوخۆی سووریادا سنووردار نەبوو، بەڵکو زیاتر بۆ وڵاتانی عەرەبی و ئەوروپی درێژ بووەوە.