پێشبینى دەکرێت ئەمڕۆ شەپۆلێکى بەفر و کڕێوە و باران بەشێکى زۆرى ناوچەکانى هەرێمى کوردستان بگرێتەوە و زۆرترینیشى لە گەرمیان دەبێت.

هەواڵ:KNNC

بەپێی ئەو پێشبینییانەى بۆ کەشوهەوا کراوە؛ ئەمڕۆ لە گەرمیان و سلێمانى و هەڵەبجە و ئیدارەى راپەڕین و بەشێکى سنورى پارێزگاى هەولێر و بەشێکى بادینان بەفر و سەرما و کڕێوە دەبێت.

شاڵاو هیدایەت پێشبینى دەکات کاریگەریی ئەم شەپۆلە تا کاتە جیاوازەکانى شەو بمێنێتەوە و تا ناوەڕاستى هەفتەش رەشەبا بێت و سەرماکەش تا کۆتایی هەفتە بەردەوام بێت.

هەروەک سیروان ساڵح، شارەزاى کەشناسى لەوبارەیەوە پێشبینى کردوە کە رێژەى بەفر و بارانەکە لەنێوان 5 ملیمەتر باران تا 5 سانتیمەتر بەفردا بێت و هۆکارەکەیشى کاریگەریی تۆپەڵە هەوایەکی ساردى سیبیریی روسیایە.

بە هەمانشێوە ئەو کەشناسەش پێشبینى دەکات زۆرینەى کاریگەرییەکانى ئەم شەپۆلە لە بەرزاییەکانی باکوری گەرمیان و ناوەڕاستی گەرمیان و بەرزاییەکانی نێوان کەرکوک و چەمچەماڵ و نێوان ناحییەی رزگاری بەرەو ناحییەی سەنگاو و بەرزاییەکانی نێوان کەلار پێباز بۆ شێخ تەویل و بەرزاییەکانی داری خلە بێت.