دواى زیاتر لە چوار مانگ لە بەڕێوەچونى هەڵبژاردنەکان، سەرۆکى هەرێمى کوردستان لە میونشنى ئەڵمانیاوە باسى لە پێکهێنانى کابینەى نوێی حکومەتى هەرێمى کوردستان کرد و لەبارەى هاتنى شاندى ئیمراڵیشەوە وتى: هیوادارین پەیامەکەیان ئاشتى بێت.

هەواڵ:KNNC

نێچیرڤان بارزانى، سەرۆکى هەرێمى کوردستان لە کۆنفرانسى ئاسایش بە میونشنى ئەڵمانیا کۆنگرەیەکى ئەنجامدا و رایگەیاند؛ دەرفەتێک بوە دور لە پرۆتۆکۆلات و لە ماوەیەکى کەمدا زۆرترین کەس ببینن و بیروبۆچونى خۆیان بگەیەنن و چەندین دیدار ئەنجام بدەن.

ئاماژەى بۆ ئەوەکرد کە لەئێستادا لەگەڵ یەکێتى نیشتیمانى کوردستان لە گفتوگۆیەکى جددیدان بۆ پێکهێنانى کابینەى دەیەمى حکومەتى هەرێمى کوردستان و تا ئێستاش بۆ ئەو مەبەستە چەندین دیداریان ئەنجامداوە لەسەر ئەو بنەمایەى چۆن لەداهاتودا لە یەک حکومەتدا بەیەکەوە کار بکەن.

وتى: هیوادارین لەماوەیەکى نزیکدا لەگەڵ یەکێتى بگەینە رێککەوتن و کۆبونەوە بۆ دابەشکردنى پۆستەکان لەگەڵ ئەو لایەنە و پێکهاتەکانى بەشدار لە حکومەت ئەنجام بدەن.

لەبارەى هاتنى شاندى ئیمراڵى بۆ هەرێمى کوردستان، نێچیرڤان بارزانى ئاشکرایکرد کە چاوەڕێ دەکەن بزانن پەیامى شاندى ئیمراڵى چییە و وتى: پێمانوایە پەیامى ئاشتىو سەقامگیرییان پێبێت بۆ تورکیا و  پەکەکە و هیوادارین گوێبیستى بانگەشەى ئاشتى بین لەلایەن ئۆجەلانەوە و پەکەکەش هەڵوێستى هەبێت و پێشوازى لە پەیامى ئۆجەلان بکات.

جەختیشى کردەوە کە کێشەى کورد لە تورکیا بە سیاسیى چارەسەر دەکرێت نەک بە چەک.

لەبارەى دۆخى ئێستاى سوریاشەوە وتى: هیوادارین ئەحمەد شەرع بتوانێت فاکتەرێک بێت بۆ سەقامگیریی سوریا و گرنگترین شت ئەوەیە هەمو پێکهاتەکان لە حکومەتى نوێدا بەشدار بن و بە لایەنە کوردییەکانیشمان وتوە کە پێویستە بەیەکەوە بچنە دیمەشق.