میسر پلانێکی داڕشتوە بۆئەوەی بەبێ ئاوارەکردنی فەڵەستینییەکان کەرتی غەززە ئاوەدان بکاتەوە، ئەوەش وەک کاردانەوەیەک بۆ پێشنیارەکەی دۆناڵد ترەمپ کە داوای چۆڵکردنی کەرتی غەززەی کردبو.

هەواڵ:KNNC

رۆژنامەی ئەلئەحرامی میسری بڵاویکردەوە، پلانەکەی میسر بریتییە لە دامەرزاندنی "ناوچەیەکی سەلامەت" لەناوخۆی غەززە بۆئەوەی فەڵەستینییەکان بەشێوەیەکی کاتی تێیدا بژین، لەهەمانکاتدا کۆمپانیا میسری و نێودەوڵەتییەکان کەرتی غەززە ئاوەدان دەکەنەوە.

بەرپرسانی میسر، سعودیە، قەتەر، ئیمارات و ئوردن، لەم هەفتەیەدا لە کۆبونەوەیەکدا لە ڕیاز، پێشنیارەکە تاوتوێ دەکەن، پلانەکە بە سێ قۆناغ جێبەجێدەکرێت و ماوەی پێنج ساڵ دەخایەنێت.

هەروەها، بەپێی پلانەکە سێ ناوچەی سەلامەت لەناو کەرتی غەززە بۆ فەڵەستینییەکان دروستدەکرێت، کە خانوی گەڕۆک و شوێنی حەوانەی تێدا دەبێت، هاوکات زیاتر لە 20 کۆمپانیای میسری و نێودەوڵەتی بەشداری لە بونیادنانەوەی غەززە دەکەن، ئاوەدانکردنەوەکەش دەبێتەهۆی دابینکردنی دەیان هەزار هەلی کار بۆ دانیشتوانی کەرتەکە.

رۆژنامه میسرییەکە باسی لەوەکردوە، ئامانجی پێشنیازەکەی میسر پوچەڵکردنەوەی قسەکانی سەرۆکی ئەمەریکا و هەر پلانێکی دیکەیە کە ئامانجی گۆڕینی پێکهاته جوگرافی و دیمۆگرافییەکانی کەرتی غەززە بێت.