وەزارەتى دەرەوەى ئەمەریکا گروپێکى چەکداریی لە عێراق خستە لیستى تیرۆرەوە و رایگەیاند؛ هێرشیان بۆسەر هاوپەیمانانى دژ بە داعش کردوە و لە هێرشەکەى ئوردنیش بۆسەر ئەمەریکا بەشدار بون.

هەواڵ:KNNC

وەزارەتى دەرەوەى ئەمەریکا لە بەیاننامەیەکدا رایگەیاند: بزوتنەوەى (أنصار الله الأوفياء العراقية) وەک گروپى تیرۆرستى و ئەمیندارى گشتى بزوتنەوەکە حەیدەر مەزهەر مەلیک سەعید، وەک تیرۆرست ناسێنراون.

وەزارەتەکە دەڵێت: ئەم بزوتنەوەیە گروپێکى میلیشیاى هاوپەیمانى ئێرانن و بنکەکەیان لە عێراقە و بەشێکن لە مقاوەمەى ئیسلامیی و چەندین جار هێرشیان بۆسەر هاوپەیمانان دژ بە داعش ئەنجامداوە.

بەیاننامەکە دەڵێت: ئەم بزوتنەوەیە بەپرسیارێتیان لە چەند هێرشێک دژى ئەمەریکا راگەیاندوە و هێرشیشیان کردوەتەسەر سەربازانیان لە عێراق و سوریا و لەو هێرشەشدا کە سێ سەربازیی ئەمەریکیی لە ئوردن تێدا کورژا بەشدار بون.

وەزارەتەکە جەختیش دەکاتەوە کە واشنتۆن تەواوى هەوڵەکانیان دەخەنەگەڕ بۆ لاوازکردنى ئەو گروپانەى لەلایەن ئێرانەوە پاڵپشتیان دەکرێت و هێرشیی تیرۆستى ئەنجام دەدەن.