توێژینەوەیەکی ئەمریکی بڵاویکردەوە کە تەواوکەری ئۆمیگا ٣ دەتوانێت مەترسی بەرزبوونەوەی کۆلیسترۆڵی بۆماوەیی کەم بکاتەوە.

تەندروستی:KNNC

توێژەرانی زانکۆی جۆرجیا ڕوونیان کردەوە، ئەم تەواوکەرە خۆراکیانە دەتوانن کاریگەری ئەو جینانە کەمبکەنەوە کە دەبنە هۆی بەرزبوونەوەی ئاستی کۆلیسترۆڵ و ترایگلیسیراید. 

کۆلیسترۆڵی بۆماوەیی، یان کۆلیسترۆڵی پەیوەندی بۆماوەیی، بریتییە لە بەرزبوونەوەی ئاستی کۆلیسترۆڵ لە خوێندا کە لە ئەنجامی هۆکارە بۆماوەییەکانەوەیە.

تەواوکەری ئۆمیگا 3 بریتیە لە تەواوکەری خۆراکی کە ترشی چەوری ئۆمیگا ٣ لەخۆدەگرێت، کە بۆ تەندروستی گشتی پێویستە و بەڕێژەیەکی زۆر لە ماسییە چەورەکانی وەک سەلەموندا هەیە.

ترشەکانی ئۆمیگا 3 ڕۆڵێکی گرنگ دەگێڕن لە پاڵپشتیکردنی تەندروستی دڵ و مێشک و کەمکردنەوەی هەوکردن و بەرزکردنەوەی تەندروستی دەرونی، بەڵام بە زۆری باشترە پێش دەستپێکردنی خواردنی هەر تەواوکەرێکی خۆراکی نوێ ڕاوێژ بە پزیشک بکەیت.

هەروەها، توێژەران بۆیان دەرکەوتوە کە تەواوکەری ئۆمیگا 3 بەشدارە لە بەرزکردنەوەی ئاستی کۆلیسترۆڵی باش لە خوێندا.

بۆ رێگریکردن لە بەرزبونەوەی کۆلیسترۆڵی زیانبەخش لە خوێندا، واباشە ڕێجیمێکی هاوسەنگ پەیڕە و بکرێت کە دەوڵەمەندە بە ریشاڵ، دورکەوتنەوە لەو خۆراکانەی دەوڵەمەندە بە چەوری تێر و هایدرۆجین، هەروەها زیادکردنی خواردنی ئەو خۆراکانەی کە ترشی “ئۆمیگا ٣”یان تێدایە، وەک ماسی .