دوای ئەوەی دۆناڵد ترەمپ وەک 47ـهەمین سەرۆکی ئەمەریکا هەڵبژێردرایەوە، وڵاتانی جیهان پیرۆزبایی سەرکەوتنی دەکەن و سەرۆکایەتی و حکومەتی هەرێمیش وێڕای پیرۆزبایی داوای بەهێزکردنی هاوبەشی و قوڵکردنەوەی پەیوەندییەکانی هەردولا دەکەن.

پەیامی پیرۆزبایی سەرۆک و سەرکردەکانی جیهان:

نێچیرڤان بارزانی سەرۆکی هەرێمی کوردستان: چاوم لە کارکردنی پێکەوەییە بۆ بەهێزکردنی هاوبەشی و قوڵکردنەوەی پەیوەندییەکانی نێوان هەرێمی کوردستان، عێراق و ئەمریکا.

مەسرور بارزانی، سەرۆکی حکومەتی هەرێمی کوردستان: چاوم لە قوڵکردنەوەی هاوبەشییە لەنێوان هەرێمی کوردستان و ئەمریکا، هەروەها پێکەوە کارکردن بۆ بەرەوپێشبردنی ئاشتی و سەقامگیریی لە ناوچەکەدا.

رەجەب تەیب ئەردۆغان سەرۆککۆماری تورکیا: پیرۆزبایی لە ترەمپی هاورێم دەکەم، هیوادارم لەم سەردەمە نوێیەدا پەیوندییەکانی نێوان تورکیا و ئەمەریکا بەهێزببن و قەیران و جەنگە هەرێمی و جیهانییەکان کۆتاییان پێبێت.

شا عەبدوڵ، پادشای ئوردن: بەوپەڕی خۆشحاڵییەوە چاوەڕێی ئەوەم دوبارە لەگەڵ ترەمپ کاربکەم بۆ بەهێزکردنی هاوبەشی درێژخایەنی نێوان ئوردن و ئەمەریکا،لە خزمەتی ئاشتی و سەقامگیری ناوچەیی و جیهانی بۆ هەموان.

ئۆلاف شۆڵز، راوێژکاری ئەڵمانیا: لەگەڵ ئەمەریکا لە مێژە پێکەوە هاوکارن بۆ بەرەوپێشبردنی خۆشگوزەرانی و ئازادی، لە پێناو بەرژەوەندی هاوڵاتییانمان بەردەوام دەبین.

یون سوک یۆل، سەرۆکی کۆریای باشور: لەژێر سەرکردایەتی بەهێزی ترەمپ، داهاتوی هاوپەیمانی کۆریای باشور و ئەمەریکا گەشاوەتر دەبێت، بەوپەڕی خۆشحاڵییەوە چاوەڕێی کارکردنم لەگەڵ ترەمپ.

سەرۆک وەزیرانی ئیسرائیل: گەڕانەوەت بۆ کۆشکی سپی پەیوەندی نێوان ئیسرائیل و ئەمەریکا بەهێزتر دەکات.

ئیمانیۆل ماکرۆن، سەرۆکی فەڕەنسا: ئامادەین بۆ پێکەوەکارکردن، وەک چۆن چوار ساڵ پێکەوە کارمانکرد.

عەبدولفەتاح سیسی، سەرۆکی میسر: هیوادارم لەگەڵ ترەمپ پێکەوە کاربکەین بۆ هێنانەدی ئاشتی و پاراستنی سەقامگیری رۆژهەڵاتی ناوەڕاست.

شێخ تەمیم بن حەمەد ئال سانی میری قەتەر: پێکەوە کاردەکەین بۆ ئاسایش و سەقامگیری ناوچەکە.

جۆجیا میلۆنی سەرۆکوەزیرانی ئیتاڵیا: پیرۆزبایی دڵسۆزانە ئاڕاستەی دۆناڵد ترەمپ دەکەم، ئیتاڵیا و ئەمەریکا دوو وڵاتی خوشکن، بەهاوپەیمانییەکی پتەو بەیەکەوە گرێدراون.

پێدرۆ سانچێز، سەرۆکوەزیرانی چەپی ئیسپانیا: بەڵێنبێت کاربکەین بۆ بەهێزکردنی هاوبەشی و پەیوەندییە ستراتیژییە دوقۆڵییەکانی نێوانمان.