وەزارەتی پێشمەرگەی حکومەتی هەرێمی کوردستان رایگەیاند: سبەینێ هاوکاری دارایی هێزەکانی هاوپەیمانان دابەش دەکرێت، دەشڵێت: هاوکارییە داراییەکە بۆ مانگی 10ـیە.

هەواڵ:KNNC

وەزارەتی پێشـەرگەی حکومەتی هەرێمی کوردستان لە راگەیاندراوێکدا بڵاویکردەوە: هاوکاریی دارایی هێزەکانی هاوپەیمانان بۆ مانگی 10 خراوەتە سەر هەژماری بانکی وەزارەتەکەیان، سبەینێش دەست دەکەن بە دابەشکردنی.

دابەشکردنی هاوکارییەکانی هێزەکانی هاوپەیمانان لە کاتێکدایە: لە ئەنجامی باڵادەستی و دەستوەردانی یەکێتی و پارتی لە نێو هێزەکانی پێشمەرگە و خاوی لە پڕۆسەی یەكخستنەوەی هێزەکانی 70 و 80، هاوپەیمانان بڕی هاوکارییەکانیان بۆ پێشمەرگە لە 20 ملیۆن دۆلارەوە کەم کردەوە بۆ 15 ملیۆن دۆلار.

پێشتریش دەنگی ئەمەریکا لە راپۆرتێکیدا بڵاویکردبوەوە: هێزەکانی هاوپەیمانان بە سەرۆکایەتی ئەمەریکا چەندین جار نیگەرانیان لە خاوی پرۆسەی یەکگرتنەوەی پێشمەرگە دەربڕیوە و بەرپرسانی هەرێمیشیان ئاگادارکردوەتەوە لەوەی ئەمەریکا هەڕەشەی بڕینی هاوکاریەکەی کردوە گەر ناکۆکیەکانی ناو وەزارەتی پێشمەرگە بەردەوامبن و هەنگاوەکانی یەکگرتنەوە جێبەجێ نەکرێن.