میدیا ئەمەریكییەكان ئاشكرایانكرد، بڕیار وایە ئەمشەو هەریەك لە سەرۆكی ئەمەریكا و جێگرەكەی پەیوەندی بە دۆناڵد ترەمپەوە بكەن و تیایدا باسی ئەنجامەكانی هەڵبژاردنی لەگەڵ تاوتوێ بكەن.

هەواڵ: (KNNC)

میدیا ئەمەریكییەكان لەسەر زاری دو یاریدەدەری كامالا هاریس، كاندیدی دیموكراتەكان بۆ هەڵبژاردنە  سەرۆكایەتییەكەی ئەمەریكا بڵاویانكردوەتەوە؛ بڕیار وایە هاریس پەیوەندی بە دۆناڵد ترەمپ، كاندیدی سەركەوتو بۆ سەرۆكی ئەمەریكاوە بكات و تیادا دوای پیرۆزبایی دان بەشكستەكەی خۆیدا بنێت.

ئاژانسی رۆیتەرزیش بڵاوی كردوەتەوە، ئەمشەو كاتژمێر (23:00) کامالا هاریس، جێگری سەرۆکی ئەمەریکا لەسەر شكست هێنانی بەرامبەر بە دۆناڵد ترەمپی ركابەری، وتارێک پێشکەش دەکات.

میدیاكانی ئەو وڵاتە ئاماژەیان بۆ ئەوەشكردوە، بە پشتبەستن بەبەرپرسێکی کۆشکی سپی جۆ بایدن، سەرۆکی ئەمەریکاش بەنیازە پەیوەندی بە ترەمپەوە بکات و ئەنجامەکانی هەڵبژاردنی لەگەڵ تاوتوێ بكات.