سەرۆک وەزیرانى عێراق بەت سەردانێک گەیشتە هەرێمى کوردستان و بڕیارە، نەوت و موچە و پێکهێنانی کابینەی نوێی حکومەتی هەرێم  و پرسی سەرژمێرى گشتى تەوەری سەرەکى گفتوگۆکان بێت.

هەواڵ:KNNC


ئیخلاس دلێمی، ئەندامى پەرلەمانی عێراق، لە لێدوانێکی رۆژنامەوانیدا رایگەیاند: ئەمڕۆ، محەمەد شیاع سودانی، سەرۆک وەزیرانی عێراق، بە سەردانێک دەگاتە هەرێمی کوردستان بۆ تاوتوێکردنی چارەسەری کێشە و ئاڵنگارییەکانی نێوان هەردو حکومەت و نوسینگەى سەرۆک وەزیرانى عێراقیش رایگەیاند؛ محەمەد شیاع سودانی، بە سەردانێک کە شارەکانی هەولێر و سلێمانی لەخۆدەگرێت گەیشتە هەرێمی کوردستان.

بە وتەی ئەو پەرلەمانتارە: پرسی پێکهێنانی حکومەتی نوێی هەرێم و پرسی سەرژمێرى و تێبینییەکانى حکومەتى هەرێم لەبارەى ئەو پرسەوە تەوەرێکی تری گفتوگۆکان دەبن.

ئاماژەی بەوەش کردوە: دوای سەردانەکەی بۆ هەولێر، محەمەد شیاع سودانی سەردانی پارێزگای سلێمانیش دەکات.

بەپێی زانیارییەکان، پرسی موچە و نەوت و پێکهێنانى حکومەتى نوێ، سێ تەوەری سەرەکى دیداری نێوان سودانى و بەرپرسانى باڵاى هەرێم دەبێت.

سەبارەت بە موچەی فەرمانبەران، ئیخڵاس دلێمی رایگەیاند: دواکەوتنی موچەى فەرمانبەران، پەیوەندیی بە گواستنەوەی پارە هەیە لە پشکی هەرێم لە بودجەی وەبەرهێنانەوە بۆ موچە و جەختیشی کردەوە، هەفتەی داهاتو سەرۆک وەزیرانی عێراق، موچەی فەرمانبەرانی هەرێمی کوردستان خەرج دەکات.