بنەماڵەى رائیدا هاوژین عەبدوڵا، سوپاسنامەیەکیان بۆ بەدەمەوەهاتنى هاوڵاتییانى هەرێمى کوردستان بۆ کۆچى دوایی کوڕەکەیان بڵاوکردەوە و رونیشیدەکەنەوە کە رائیدا هاوژین کێشەى لەگەڵ هیچ کەس و لایەنێکدا نەبوە و هەمیشە لەو بەرپرسیارێتیانەى لە ئەستۆیدا بوە بێ جیاوازى لە خزمەتى هاوڵاتییاندا بوە.



دەقى سوپاسنامە و رونکردنەوەکەى بنەماڵەى رائید هاوژین:


‎بەناوی خانەوادەی رائید هاوژین عەبدوڵا سوپاس و پێزانینی خۆمان ئاڕاستەی تەواوی خزمان و دۆستان و هاوڕێیان و سەرجەم کەسایەتی و ئەو لایەنانە دەکەین کە هەر لە سەرەتای کۆچی ناوەختەی جوانەمەرگ رائید (هاوژین عەبدوڵا)ەوە بەشداربون لەگەڵمان لە ڕێوڕەسمی بەخاکساردن و بەشداریکردن لە پرسەکەیدا.

جوانەمەرگ هیچ کێشەیەکی لەگەڵ هیچ کەس و لایەنێک نەبوە،خەمباری تەواوی هاوڵاتیان و چین و توێژەکان بۆ ئەم کۆستە گەورەیە سەلمێنەری ئەو ڕاستییەیە کە ناوبراو لەماوەی خزمەتیدا وەکو ئەفسەرێکی نەبەرد و لەو بەرپرسیارێتییە گەورانەی پێی دراوە و هەمیشە بێ جیاوازی لە خزمەتی تەواوی هاوڵاتیاندا بوە و هەمو کارەکانی لە خزمەتی چاکەی گشتیدا بوە.

ئەوە جگە لەوەی لە هەمو خۆشی و ناخۆشییەک و بۆنەکاندا بەدەم خەڵکەوە بوە. هاوکات هیچ رۆژێک ئەرکێکی بچوکی نەخستوەتە سەر هیچ کەسێک و هەمیشە رائید هاوژینی جەوازات ئەو کەسبوە کە لای دۆست و بێگانە شانازییەوە باسکراوە و باس دەکرێت.

سوپاسی تایبەت و بێ پایانی بەڕێوەبەری پاسپۆرتی پارێزگای سلێمانی دەکەین بە تەواوی کارمەند و ئەفسەرانییەوە کە رۆڵێکی کارایان هەبو لە مەراسیمی پرسەی جوانەمەرگدا.

بەشداری خزم و کەس و دۆست و هاوڕێیان و کەسایەتی و بەرپرسە حکومی و حیزبییەکان لەم کاتە قورس و نا هەموارەدا، خەمی ئێمەی ڕەواندەوە، واتان لێ کردین ھەست بە ئارامی بکەین.

خودای گەورە رۆحی کۆچکردو شاد بکات و جێگەی بەهەشتی نەبڕاوە بێت.

13/11/2024
بنەماڵەی کۆچکردو
عەبدوڵا ئەحمەد رەسوڵ ژاژڵەیی