دەزگای فریا گوزاری نەتەوە یەكگرتوەكان رایدەیگەیەنێت: بەهۆی جەنگی نێوان حەماس و ئیسرائیلەوە زۆرترین قوربانیان منداڵن، ئێستا غەززە بوە بە گۆڕستانی منداڵەكان.

هەواڵ: (KNNC)

فیلیپ لازارین، نوێنەری گشتی دەزگای فریاگوزاری نەتەوە یەکگرتوەکان (UNRWA) بۆ پەنابەرانی فەلەستینی رایگەیاند: لەئەنجامی جەنگی نێوان بزوتنەوەی حەماس و سوپای ئیسرائیل لە كەرتی غەززەی فەلەسستین، ژمارەیەكی زۆر خەڵكی مەدەنی كراون بە قوربانی كە زۆربەی قوربانییەكانیش منداڵن.

ئاماژەی بۆ ئەوەشكردوە، منداڵان لە کەرتی غەززە دەکوژرێن، برینداردەکرێن، ئاوارەدەبن، لە سەلامەتی و خوێندن و پەروەردە بێبەش دەکرێن، جەنگەكە منداڵی و تەمەنی لێ دزیون بۆیە و لە ئێستاوە لەبەردەم نەوەیەکی ونبودان.

جەنگی نێوان حەماس و سوپای ئیسرائیل پێی ناوەتە (411)ـهەمین رۆژیەوە و لە (24) كاتژمێری رابردودا فڕۆكە جەنگییەكانی ئیسرائیل دو هێرشیان كردوەتە سەر غەززە و بەهۆیەوە (13) گیان لەدەستدان و بریندار بونی (84) كەسی دیكەی لێكەوتوەتوە.

هاوكات، وەزارەتی تەندروستی غەززە ئاماری قوربانیانی جەنگی حەماس – ئیسرائیلی بڵاوكردەوە و رایگەیاند: لە (7ـی ئۆكتۆبەری 2023)ـوە تا ئێستا (40) هەزار و (985) گیان لە دەستدان و برینداربونی (104) هەزار و (92) كەسی دیكە برینداربون.

رونیكردوەتەوە، تا ئێستا بەهۆی هێرشە بەردەوامەكانی سوپای ئیسرائیلەوە نەتوانراوە بەهانای ژمارەیەك لە  قوربانیانی جەنگەكەوە بڕۆن، كە تا ئێستا لەژێر باڵەخانە روخاوەكاندان.