ئەڤۆکادۆ کە بە 'کەرەى سروشتى' ناسراوە، سامانێکى تەندروستییە، لە باشترکردنى تەندروستى دڵەوە بۆ کۆنتڕۆڵکردنى کێش و رەونەقدارکردنى پێست و چارەسەرکردنى کێشەى هەرس، ئەم میوەیە دەوڵەمەندە بە ریشاڵ و ڤیتامینە سەرەکییەکان و خواردنى تەنها یەک دانە لە رۆژێکدا چەندین سودى تەندروستیت پێدەبەخشێت لەوانەش:



تەندروستى:KNNC

-پڕە لە چەورى سودبەخش
ئەوڤۆکادۆ دەوڵەمەندە بە چەورییە ناتێرەکان، بەتایبەت ترشى ئەولیک، ئەم چەوریانە تایبەتمەندى تەندروستى دڵیان تێدایە و کۆلیسترۆڵى خراپ دادەبەزێنن و کۆلیسترۆڵى سودبەخش بەرزدەکەنەوە و ئەو چەوریانە دادەبەزێنن کە مەترسین بۆ توشبون بە نەخۆشییەکانى دڵ.



-دابەزاندنى کێش
لەگەڵ ئەوەى بڕێکى زۆر کالۆرى تێدایە، بەڵام دەکرێت سودى هەبێت بۆ کۆنتڕۆڵکردنى کێشى لەش، چونکە دەوڵەمەندە بە ریشاڵ و بەمەش وادەکات بۆماوەیەکى زۆر هەستى تێربونت هەبێت و رەنگە لە خواردنى سوکەژەمە خراپەکان دورت بخاتەوە.



-قژ و پێست جوان دەکات
ئەڤۆکادۆ جوانى زیاتر دەکات، ئەویش بەهۆى ئەو چەورییە تەندروست و دژە ئۆکسان و ڤیتامینانەى تێیدایە، کاردەکەن بۆ شێدارکردنەوەى پێست و نەهێشتنى نیشانەکانى پیربون بەهۆى ئەوەى بایۆتینیشى تێدایە قژ بەهێز و رەونەقدار دەکات.




-هاوکاریی پرۆسەى هەرسکردن دەکات
ئەڤۆکادۆ چەورى تواوە و نەتواوەى تێدایە، ئەمەش سودێکى زۆرى بۆ سیستمى هەرس هەیە و ریشاڵەکان کاردەکەن بۆ باشترکردنى جوڵەى ریخۆڵەکان و لە قەبزبون دەتانپارێزن.

-بەهێزکردنى ئێسک
خواردنى ئەڤۆکادۆ بەشێوەیەکى رۆژانە هاوکاریی تەندروستى ئێسک دەکات ئەویش بەهۆى ئەوەى رێژەیەکى زۆر ڤیتامین کەى  و مەگنیسیۆم و پۆتاسیۆمى تێدایە و ڤیتامین کەى هاوکار دەبێت لە باشترکردنى ئێسک و هاوکارى هەڵمژینى کالیسیۆم دەکات.

مەگنیسیۆمیش کە پێکهاتەیەکى دیکەى ئەڤۆکادۆیە هاوکار دەبێت لە چڕى ئێسک و لە داخورانى ئێسک بەدورت دەخات.

کەمکردنەوەى هەوکردن
هەوکردنى درێژخایەن هۆکارى چەندین نەخۆشین، لەنێویاندا نەخۆشییەکانى دڵ و و هەوکردنى جومگەکان و نەخۆشی شێرپەنجە، بەو دژە ئۆکسان و ماددانەى لە ئەڤۆکادۆدا هەیە وەک کارۆتینات و تۆکۆفیرۆل، دژەهەوکردنێکى باشت دەست دەکەوێت، بەمەش نیشانەکانى بونى هەوکردن لە لەشتدا کەم دەبێتەوە و تەندروستیت بە گشتى بەرەو باشتر دەڕوات.