وتەبێژی هێزەكانی سوریای دیموكرات لە بەنداوی تشرینەوە هەواڵی كۆنترۆڵكردنی بەنداوەكە لەلایەن چەكدارانی نزیك لە توركیا رەت دەكاتەوە.


هەواڵ: (KNNC)


ئەمڕۆ پێنجشەممە (2024/12/26) فەرهاد شامی، وتەبێژ هێزەكانی سوریای دیموكرات رەتی دەكاتەوە چەكدارە نزیكەكانی توركیا بەنداوی تشرینیان كۆنترۆڵ كردبێت و رایدەگەیەنێت: بەنداوی تشرین و سەرجەم شار و گوندی ناوچەكە لەژێر كۆنترۆڵی هێزەكانی دیموكرات (هەسەدە)ـدایە.


وتیشی: لە (20) رۆژی رابردودا، سوپای توركیا و چەكدارە نزیكەكانی ئەو وڵاتە چەندین هێرشیان كردوەتە سەر بەنداوی تشرین و هەوڵی كۆنترۆڵكردنیان داوە، بەڵام لەلایەن هێزەكانی سوریای دیموكراتەوە شكست بە هێرشەكانیان هێنراوە.


ئەوەشی رونكردوەتەوە: بڵاوكردنەوەی ئەو هەواڵانەی وەزارەتی بەرگری توركیا بۆ بەرزكردنەوەی ورەی چەكدارە نزیكەكانییانە، ئەو لەكاتێكدایە كە لەو ماوەیەدا زیاتر لە (450) چەكداریان لێكوژراوە لەگەڵ تێكشاندنی دەیان زرێپۆش و تانك.


فەرهاد شامی، وتەبێژی هەسەدە ئاماژەی بۆ ئەوەشكرد، ئەم ناوچە بەتەوای لەژێر كۆنترۆڵی تەوای هێزەكانی سوریای دیموكراتدایە و پارێزگاری لێدەكات كە لەلایەن سوپای توركیاوە ژمارەیەكی زۆر هێرشی ئاسمانی كراوەتە سەری.