لە سەنتەرى شارى سلێمانى دەستکراوە بە لابردنى کامێرا رادارە جێگیرەکان و لەجێی ئەوانیش کامێراى دیجیتاڵى پێشکەوتوتر دادەنرێت کە جگە لە تیژڕۆیی سەرپێچى دیکەیش تۆمار دەکات.

هەواڵ:KNNC

کامێرا رادارە جێگیرەکانى رێگاى راپەڕین-تاسڵوجە  لە شارى سلێمانى لابراون و لەبارەى هۆکارەکەیشەوە عەمید ئاسۆ محەمەد، بەڕێوەبەرى هاتوچۆى سلێمانى بە کەى ئێن ئێن،ى راگەیاند؛ ئەم کامێرایانە سیستمەکەیان دیجیتاڵى و پێشکەوتو نەبوە و بۆ تۆمارکردنى سەرپێچییەکان لە بەڕێوەبەرایەتییەکەیان هەفتانە دەبو لەڕێی فلاشەوە سەرپێچییەکان ببرێنەوە بەڕێوەبەرایەتییەکەیان و تۆمار بکرێن.

ئاماژەى بۆ ئەوەکرد کە لەبەر ئەو هۆکارە تەواوى ئەو کامێرا رادارە جێگیریانە لە سەنتەرى شارى سلێمانى دانراون و ژمارەیان 24 کامێرایە کە لە بازنەیی مەلیک مەحمود تا رێگاى تاسڵوجەیە لادەبرێن و لەجێگەیان کامێراى دیجیتاڵى پێشکەوتو دادەنرێت کە جگە لە تۆمارکردنى خێرایی نەبەستنى پشتوێنى سەلامەتیی و بەکارهێنانى مۆبایلیش تۆمار دەکات.

ئاشکرایکرد  کە دانانى ئەم کامێرا نوێیانە لە داهاتویەکى نزیکدا کۆتایی دێت و جێگیر دەکرێن.

لەبارەى قۆناغە سێهەم و چوارەمى کامێراکانى پۆینت تو پۆینت، بەڕێوەبەرى هاتوچۆى سلێمانى ئاشکرایکرد کە لە داهاتویەکى نزیکدا قۆناغى سێهەمى کامێراکان لە سلێمانى-هەڵەبجە دەستپێدەکات و دواتریش لە رێگاى سلێمانى-دەربەندیخان-کەلار دادەنرێن.

سلێمانى/ بڕیار نامیق