پسپۆڕێكی كەشوهەوا رایدەگەیەنێت كە زستانی ئەمساڵ سەخت دەبێت و بەپێی پێشبینییەكانیش لە (25ـی شوبات)ـەوە شەپۆلەكە دەستپێدەكات.


هەواڵ: (KNNC)


د.سەڵاحەدین عەبدولقادر، پسپۆڕی كەشوهەوا رایگەیاند: بەپێی پێشبینییەكان، چاوەڕێ دەكرێت زستانی  ئەمساڵ یەكێك بێت لەئەو ساڵانەی كە بڕێكی زۆر باران و بەفر تیایدا دەبارێت و پلەكانی گەرما زۆر دادەبەزن، هەر لەو روەشەوە پەیمانگای (ماكس پڵانك)ـی ئەڵمانی هۆشداری بەڕۆژهەڵاتی ناوەڕاست و وڵاتە عەرەبییەكان داوە كە لەڕوی كەشوهەواوە بەبارودۆخێكی سەختدا تێدەپەڕن.


وتیشی: ئەو پەستانە بەرزەی لە خولگەكانی باكوری زەوییەوە روی لە هەرێم و ناوچەكە كردوە، زۆر بەهێزە و كاریگەری لەسەر نزمە پەستانی ئەم ناوچە دەكات و كەشوهەوای ناوچەكە دەگۆڕیت، بۆیە ئەگەر لە كۆتایی ئەم هەفتە شەپۆلەكە ور لە ناوچەكە نەكات، لەدوای (25ـی شوبات)ـەوە شەپۆلە سەرماكە دەستپێدەكات.


رونیكردەوە، شەپۆلە سەرماكە زیاتر بەفر بارین و دابەزینی پلەكانی گەرمایە، بەڵام لە هەندێك ناوچە ئەگەری باران بارینیش هەیە، ئەوەش لە ئەنجانی تێكچونی هەردو سیستەمی لانینۆ و لانیناوەیە كە ئەو گۆڕانكارییە دروستبوە.


پسپۆڕەكەی كەشوهەوا ئاماژەی بۆ ئەوەشكرد، پەستانی سەر هەرێمی كوردستان لە (1.12) باڕدایە و خێرایی "با" نایگرێتەوە، بەڵام مەترسییەكە لەسەر دابەزینی پلەكانی گەرمایە و سەرماكەی سەخت دەبێت.