ئاسایشی هه‌ولێر رایدەگەیەنێت: مامه‌ڵه‌كردن به‌دراوی ئه‌لیكترۆنی
و كانزایی كۆمپانیای فۆڕێكس و دراوه ئه‌لیكترۆنیه‌كان قه‌ده‌غه‌یه، داواش له هاوڵاتیان
ده‌كات؛ بۆئه‌وه‌ی توشی زیانی ماددی نه‌بن، له‌وجۆره مامه‌ڵانه دوربكه‌ونه‌وه.
هەواڵ: (KNNC)
به‌ڕێوه‌به‌رایه‌تی ئاسایشی ئابوری سه‌ر
به به‌ڕێوه‌به‌رایه‌تی گشتی ئاسایشی هه‌ولێر بڵاویكردەوە؛ ئاگاداری هاوڵاتیانی هه‌رێمی
كوردستان ده‌كات كە مامه‌ڵه‌كردن به‌هه‌مو جۆره‌كانی دراوی ئه‌لیكترۆنی و كانزایی فۆڕێكس و (USDT) قه‌ده‌غه‌یه
لەبەر ئەوەی كە كۆمپانیاكانی فۆڕێكس و دراوی ئه‌لیكترۆنی له هه‌رێمی كوردستان و
عێراق رێگه‌پێدراو نین و مۆڵه‌تی فه‌رمیان نیه.
رونیكردەوەتەكە؛ به‌پێی بڕیار و رێنماییه‌كانی بانكی ناوه‌ندی
عێراق و وه‌زاره‌تی دارایی و ئابوری هه‌رێمی كوردستان رێگه‌پێدراو نین و هیچ یاسا
و رێنماییه‌ك نیه بۆ رێكخستنی ئه‌م جۆره چالاكیانه.
دەشڵێت: ئه‌و كۆمپانیایانه‌ی له‌ژێر ناوی جیاجیا كاری
فۆڕێكس و كردنه‌وه‌ی خولی فێربونی چۆنیه‌تی مامه‌ڵه‌كردن و كڕینی دراوی ئه‌لیكترۆنی
و كانزایی ئه‌نجامده‌ده‌ن، نایاسایین و رێگه‌پێدراو نین.
راشیگەیاندوە: دوای چه‌ندین سكاڵای هاوڵاتیان و زه‌ره‌رمه‌ندبونیان
له‌رێگه‌ی ئه‌م كۆمپانیا و بڕۆكه‌رانه، ئه‌م به‌یاننامه‌یه بڵاوده‌كه‌نه‌وه و
داوا له هاوڵاتیانی هه‌رێمی كوردستان ده‌كه‌ن، بۆ ئه‌وه‌ی توشی زیانی ماددی نه‌بن،
لەوجۆره مامه‌ڵانه دوربكه‌ونه‌وه و پاره‌كانیان به‌فیڕۆنه‌ده‌ن به پڕوپاگه‌نده
و ریكلامی كۆمپانیا و بڕۆكه‌ره‌كان هه‌ڵنه‌خه‌ڵه‌تێن و خۆیان لێ به‌دوربگرن.
به‌ڕێوه‌به‌رایه‌تی ئاسایشی ئابوری سه‌ر به به‌ڕێوه‌به‌رایه‌تی
گشتی ئاسایشی هه‌ولێر ئاماژەی بۆ ئەوەشكردوە، ئاگاداری گشت كۆمپانیا و بڕۆكه‌ره‌كان
ده‌كه‌نه‌وه له‌رێگه‌ی سۆشیال میدیا ریكلام بۆ كاری فۆڕێكس و دراوه كانزاییه‌كان
نه‌كه‌ن، به‌پێچه‌وانه روبه‌ڕوی لێپێچینه‌وه‌ی یاسایی ده‌بنه‌وه.
234 جار خوێندراوەتەوە