دوای دوبارەی دەستبەكاربونەوەی وەك سەرۆكی ئەمەریكا، ترەمپ یەكەم پشكنینی گشتی بۆ تەندروستی خۆی ئەنجامدا و دەڵێت: لەڕوی تەندروستییەوە لەجاران زۆر باشترم.

هەواڵ: (KNNC)


ئەمڕۆ هەینی، لە تۆڕی كۆمەڵایەتی (ترۆث سۆشیاڵ) كەخۆی خاوەندارێتی دەكات، دۆناڵد ترەمپ، سەرۆكی ئەمەریكا بڵاویكردەوە، یەكەم پشكنینی گشتی بۆ تەندروستی بەخولی دوەمی سەرۆكایەتییەكەی ئەنجام داوە و لەڕوی تەندروستییەوە لەجاران زۆر باشترم.

ترەمپ کە لە مانگی حوزەیرانی ئەمساڵدا تەمەنی (79) ساڵی تێدەپەڕێنێت، زۆر ئارەزوی خواردنە خێراكان دەكات و زۆربەی كاتیش باسی تەندروستی جەستەیی و دەرونی بەهێزی خۆی دەکات.

سەبارەت بەئەو پشكنییانەی لەلایەن تیمە تەندروستییەكەوە بۆ سەرۆكی ئەمەریكایان ئەنجامداوە، كۆشكی سەپی وەڵامی میدیاكانی ئەو وڵاتەی نەداوەتەوە.

پێشتر و لەساڵی (2018) پزیشکێکی کۆشکی سپی كە لە خولی یەکەمی سەرۆكایەتی دۆناڵد ترەمپ، پشكنینی بۆ ئەنجامداوە رایگەیاند، بەشێوەیەكی گشتی تەندروستی سەرۆك زۆر باشبوە، بەڵام پێویستی بەدابەزاندنی کێش و  دەستپێکردنی وەرزشی رۆژانە هەیە.

لەمانگی تەمموزی ساڵی (2024) لە میتینگێکی بانگەشەی هەڵبژاردندا لە ویلایەتی پێنسیلڤانیا ترەمپ لە هەوڵێکی تیرۆرکردن رزگاری بو، بەڵام گولـلەكە بەر گوێچكەی راستی كەوت و بەسوكی برینداری كرد.