توێژینەوەیەکی نوێ کە لەلایەن زانایانی زانکۆی ئۆتاوا لە وڵاتی کەنەدا ئەنجامدراوە، دەریخستوە مانەوە و خۆ نوقمکردن لە ئاوی سارددا بۆ ماوەیەکی دیاریکراو،  دەبێتە هۆی باشترکردنی تەندروستی خانەکان و دواخستنی  پیربون.

تەندروستی: KNNC


لە نوێترین توێژینەوەدا  کە لەسەر گەنجانی تەندروست ئەنجامدراوە، دەرکەوتوە  مانەوە لە ناو ئاوی ساردا دەبێتە هۆی  تازەبونەوەی خانەکان، لە هەمان کاتدا نەهێشتنی خانە زیانلێکەوتوەکانیش.

 لە توێژینەوەکەدا، کە تێیدا  10 گەنج هەمو ڕۆژێک بۆ ماوەی یەک کاتژمێر بۆ ماوەی هەفتەیەک لە ئاوی سارددا ماونەتەوە، و ئەو ئاوەشی کە تێیدا بون  لە پلەی گەرمی 14 پلەی سەدی لە ژێر سفرەوە بوە.

ئەو گەنجانە پێش تاقیکردنەوەکە و دوای تاقیکردنەوەکەش  نمونەی خوێنیان لێ وەرگیراوە بۆ ئەوەی جیاوازییەکان بزانرێت، ئەنجامەکان دەریانخستوە کە "دوای بەرکەوتن بە سەرمایەکی زۆر و  بەردەوامبونی بەرکەوتن بە سەرما بە درێژایی هەفتەکە، نیشانەی چالاکبونی جەستە زیادیکردوە و هەروەها ئاماژەکانی تێکچونی خانەکان کەمبونەتەوە".

توێژەری توێژینەوەکە کە دکتۆر کێلی کینگ دەڵێت: "ئەمە ئەوە پیشان دەدات کە خۆگونجاندن لەگەڵ سەرما دەتوانێت یارمەتی جەستە بدات بە شێوەیەکی کارا لەگەڵ بارودۆخە سەختەکانی ژینگەدا ڕوبەڕوبێتەوە، بەڵام سەرمان سوڕما لەوەی کە جەستە چەندە خێرا خۆی لەگەڵیدا گونجاندوە".

جەختیشیکردوەتەوە؛ "بەرکەوتنی سەرما دەتوانێت یارمەتیدەر بێت لە ڕێگریکردن لە نەخۆشی و ڕەنگە تەنانەت دواخستنی پیریس لەسەر ئاستی خانەکان"، دەشڵێت: ئەم توێژینەوەیە تیشک دەخاتە سەر گرنگی بەرنامەکانی گونجاندن بۆ باشترکردنی تەندروستی مرۆڤ، بەتایبەتی لەو ژینگەیانەی پلەی گەرمییان بەرزە.

توێژەرانی توێژینەوەکە ئەوەشیان خستوەتە رو، کە "ئەنجامەکان تەنها بۆ پیاوانی گەنج و تەندروست دەگونجێت و توێژینەوەی زیاتر پێویستە بۆ پشتڕاستکردنەوەی کاریگەرییەکەی لەو کەسانەی تەمەنیان جیاوازە و خاوەن تەمەنی دیکەن".