هاکان فیدان، وەزیری دەرەوەی تورکیا، ڕایگەیاندوە؛ نایانەوێت شایەتی هیچ هێرشێکبن کە بکرێتە سەر تاران،  لە بارەی سوریاشەوە وتویەتی؛ سوریا نە هی تورکیایە نە ئیسرائیل و  ئەوان لەو خاکەشدا  بە دوای شەڕەوە نین.


هەواڵ:KNNC

ئەمڕۆ هەینی، وەزیری دەرەوەی تورکیا لە چاوپێکەوتنێکدا لەگەڵ ئاژانسی ڕۆیتەرز ڕایگەیاندوە؛ ئەنقەرە نایەوێت شایەتحاڵی "هیچ هێرشێک بێت بۆ سەر ئێرانی دراوسێیان". 

هاکان فیدان جەختیشی لەوە کردوەتەوە؛ کە پێویستە لە بری ڕێگەی شەڕکردن، ئەمەریکا و ئێران  دیپلۆماسی بۆ چارەسەرکردنی ناکۆکییەکان بەکاربهێنن و  دەبێت هەموان لەوە تێبگەن ناوچەکە بەرگەی شەڕێکی دیکە ناگرێت.

لەبارەی هێرشەکانی ئیسرائیلیشەوە بۆسەر سوریا، هاکان بە ئاژانسەکەی راگەیاندوە؛، نایانەوێت  توشی هیچ ڕوبەوبونەوەیەک ببن لەگەڵ ئیسرائیل دا لە خاکی سوریا، وتوشیەتی؛ دەبێت هەموان ئەوە بزانن سوریا نە هی تورکیایە و  نە هی ئیسرائیلە، بەڵکو سوریا تەنها هی خەڵکەکەی خۆیەتی و ئەوان خۆیان بڕیار دەدەن.

هاکان جەختیشی کردوەتەوە وەک تورکیا نایەوێت  توشی هیچ ڕوبەڕوبونەوەیەک بن لەگەڵ ئیسرائیل لە سوریا، ئەمەش لە دوای ئەوە دێت  دوبارە هێرشەکانی ئیسرائیل بۆ سەر شوێنە سەربازییەکانی سوریا چربوەتەوە و بە جۆرێک لە جۆرەکان  توانای حکومەتی نوێی سوریای تێکشکاندوە بۆ ڕێگریکردن لە هەڕەشەکان و لە هەوڵدایە بەتەواوەتی لاوازیان  بکات.

لە بارەی حکومەتی نوێی سوریاوە ، هاکان وتویەتی؛ "ناتوانین بەناوی سوریایەکانەوە قسە بکەین و ئاسایشی سوریا دەبێت لەلایەن سوریاییەکانەوە بڕیاری لەسەر بدرێت، ئەگەر بیانەوێت هاوبەشی لەگەڵ هەندێک وڵات و هەندێک کۆمەڵگەی نێودەوڵەتی بکەن، ئەوا پێشوازییان لێ دەکرێت،  ئەگەر بیانەوێت هەندێک لێکتێگەیشتنیان لەگەڵ ئیسرائیلییەکان هەبێت، ئەوەش پەیوەندی بە خۆیانەوە هەیە و  کاری خۆیانە".