جیهان چاوەڕوانی دوایین بڕیارەکانی دۆناڵد ترەمپە کە بڕیارە کۆمەڵێک باجی گومرگی لەسەر بازرگانی جیهانی رابگەیەنێت و بە یەک پاکێج باج بەسەر هەمو وڵاتان دەسەپێنێت.

هەواڵ:KNNC

دۆناڵد ترەمپ، سەرۆکی ئەمەریکا رایگەیاند، پاکێجێکی گەورەی باج بەسەر هەمو وڵاتان دەسەپێنێت، بەتایبەت ئەو وڵاتانەی نا هاوسەنگی بازرگانییان هەیە واتە قەبارەی هەناردەیان بۆ ئەمەریکا زۆر زیاترە لە قەبارەی هاوردەیان.

ترەمپ، ئەمڕۆ (2)ـی نیسانی بە رۆژی رزگاری ناوزەند کردوە و دەڵێت: ئەو بەرەنگاربونەوە گومرگییانەی لەم هەفتەیەدا رادەگەیەنرێن، هەمو وڵاتان دەگرێتەوە نەک تەنها ژمارەیەکی سنوردار.

پێشتر، سکۆت بێسانت وەزیری گەنجینەی ئەمریکا باسی لە سەپاندنی باجی 15%ی هاوبەشەکان کرد کە ئاڵوگۆڕی بازرگانییان لەگەڵ ئەمەریکا هەیە، ترەمپ لە وەڵامی پرسیارێکی رۆژنامەونوساندا وتی: من باجی 15٪ یان 10٪ـم نەبیستوە بەڵکو ژمارەکە زۆر زیاترە.

عێراق، یەکێکە لەو وڵاتانەی کە ناهاوسەنگی بازرگانی لەگەڵ ئەمریکادا هەیە، لە ساڵی 2023 عێراق بە بەهای نزیکەی 9 ملیار دۆلار کاڵای هەناردەی ئەو وڵاتە کردوە، لەنێویاندا بایی 6 ملیار دۆلار نەوتی خاو،بەڵام لەبەرامبەردا بەبەهای تەنها یەک ملیار و 400 ملیۆن دۆلار کاڵای لە ئەمریکاوە هاوردە کردوە.