وەزیری بەرگری ئیسرائیل پەیامێك بۆ جۆلانی دەنێرێت و دەڵێت: بۆ روبەڕوبونەوەی مەترسییەكانی سەر وڵاتەكەی لەناوچە پارێزراوەكانی سوریا دەمێننەوە و هێرشەكانی دوێنێ شەویش گەیاندنی پەیامێكە بە دیمەشق.

هەواڵ: (KNNC)

ئەمڕۆ پێنجشەممە، لەبەیاننامەیەكدا ئیسرائیل کاتز، وەزیری بەرگری ئیسرائیل رایگەیاند، بۆ بەرەنگاربونەوەی مەترسییەكان و هەڕەشەکانی سەر ئاسایشی وڵاتەکەی، هێزەکانی سوپای ئیسرائیل لە ناوچە پارێزراوەکان لە ناوخۆی سوریادا دەمێننەوە و هەركاتێكیش پێویست بكات بەتوندی وەڵامی مەترسییەكان دەدەنەوە.

وەزیری بەرگری ئیسرائیل هۆشداری بە ئەحمەد شەرع، سەرۆكی سوریا داوە و لەبڵاوكراوەكەیدا بە ناوی (ئەبو محەمەد جۆلانی) ناوی هێناوە دەڵێت: رێگەدان بەهاتنی هێزی بیانی بۆ سوریا، وڵاتەكەت باجێك قورس دەدات، چونكە ئەوە هەڵوێستێكی دوژمنكارانەیە بەرامبەر بە تەلئەبیب.

رونیكردوەتەوە؛ هێرشە ئاسمانییەکانی شەوی رابردو بۆ سەر حەما و دیمەشق پەیامێکی رون و هۆشداریی ئیسرائیلە بۆ داهاتو، رێگە نادەین هیچ زیانێک بە ئاسایشی ئیسرائیل بگەیەنین.

لای خۆشیەوە، وەزارەتی دەروەی سوریا رایگەیاند: لەئەنجامی هێرشەكانی ئیسرائیل بۆسەر سوریا بەگشتی و بەدیاریكراوی بۆ سەر فڕۆكەخانەی حەمات بێجگە لەئەوەی كە بەتەواوی فڕۆكەخانەكە خاپور بوە، هاوكات بوەتە هۆی گیان لەدەستدان و برینداربونی دەیان هاوڵاتی مەدەنی و سەربازی، ئاماژەی بەوەشکردوە: ئەم پەرەسەندنە هەوڵێكە بۆ تێكدانی سەقامگیری سوریا و درێژەدان بە ئازاردانی گەلەكەی.

لە دوای روخانی رژێمی ئەسەد، ئیسرائیل دەیان هێرشی ئاسمانی بۆ سەر ئەو وڵاتە ئەنجامداوە و  زۆربەی تواناکانی سوپای سوریای لەناوبردوە.