ڕۆژنامەی تەلەگراف لە زاری بەرپرسێکی باڵای ئێرانەوە بڵاویکردوەتەوە، تاران بڕیاری داوە هێزە سەربازییەکانی لە یەمەن بکشێنێتەوە و دەستبەرداری پشتیوانیکردنی حوسییەکان ببێت.

هەواڵ:KNNC


ئەمڕۆ پێنجشەممە ڕۆژنامەی تێلێگراف بە پشت بەستن بە بەرپرسێکی باڵای کۆماری ئیسلامی ئێران نوسیویەتی، تاران بڕیاری داوە هێزە سەربازییەکانی لە یەمەن بکشێنێتەوە و واز لە پشتیوانیکردنی چەکدارە حوسییەکان بهێنێت.

 ئەم هەنگاوەی تاران لە دوای ئەوە دێت ئەمەریکا چەندین جر هۆشداری بە ئێران داوە لەوەی دەستبەرداری حوسییەکان ببێت و لە چەند ڕۆژی رابردوشدا وشنتۆن،  هێرشە ئاسمانییەکانی بۆ سەر حوسییەکان چڕتر کردوەتەوە.

لای خۆشیەوە  دۆناڵد ترەمپ، سەرۆک کۆماری ئەمەریکا چەندین جار هۆشداری داوە لەوەی کە کۆماری ئیسلامی دەبێ کۆتایی بە پشتیوانییەکانی بۆ ئەو گروپە بهێنێت.

ئەو بەرپرسە باڵایەی کۆماری ئیسلامی ڕایگەیاندوە کە ئەو بڕیارە بە ئامانجی "پێشگرتن لە ململانێی ڕاستەوخۆ لەگەڵ ئەمەریکا" دراوە، بە تایبەت لە ئەگەری کوژرانی بەرپرسێکی باڵایان لە یەمەن ئەوا ئەگەری ڕوبەڕوبونەوەیی سەربازی زیاتر دەکات.

 
بەگوێرەی زانیارییەکانی تەلەگراف، تاران پێداچونەوە بە سیاسەتی خۆی بەرامبەر بە گروپە وەکالەتییەکانی ناوچەیی دەکات، لەمەوداو سەرنجی سەرەکی خۆی لەسەر "هەڕەشەی ڕاستەوخۆی ئەمەریکا" داناوە.

ئەو بەرپرسە بە ڕۆژنامەکەی راگەیاندوە، کە لە ئێستادا، پرسی سەرەکیی کۆبونەوەکانی بەرپرسانی ئێران،  دۆناڵد ترەمپ و چۆنیەتی ڕوبەڕوبونەوەی سیاسەتەکانییەتی،  ئاماژەی بەوەش کردوە؛ لە هەمو کۆبونەوەکاندا گفتوگۆی سەرەکی ترەمپە و چیتر هیچ باسێک لەبارەی ئەو گووپە ناوچەییانە ناکرێت کە پێشتر پشتیوانیمان لێکردون.